1st North-East Ju-Jitsu Championship-ah Gold 6 & Bronze 3
January ni 31 atanga February ni 2 chhung khan Guwahati, Assam-ah 1st North-East Ju-Jitsu Championship neih a ni a. Ju-Jitsu Association of Mizoram (JAM) chuan Mizoram aiawh turin athlete 5 leh coach 1 a tir a, Gold medal 6 leh Bronze medal 3 an rawn hawn a ni.
Ju-Jitsu hnuaiah hian fighting style chi 3 - Ne-Waza (Brazilian Jiu-Jitsu), Contact Fighting (MMA Rules) leh Fighting System (Semi Contact striking leh Grappling) a awm a. Mizoram aiawha kalte hi JAM-in team entry fee, thlen man leh ei leh in man a tumsak vek a, SPES Martial arts Academy-in kal man a tumsak bawk.
Ju-Jitsu hi khawvela Martial arts thang chak berte zing ami niin kum naupang ber atanga upa ber thleng pawha zir theih, self-defense leh MMA atan pawha tangkai berte zing ami a ni a, ram thenkhatah phei chuan police leh school naupangten an zir ngei ngei a ngai hial a ni. Mizoramah pawh hruaitute thahnemngaihna-in national leh regional tournament ah intirh ziah a ni a, Ju-jitsu hi Ministry of Sports recognized game a nih bakah OCA pawm niin Asian Games-ah hial medal game-ah telh a ni tawh a. India rama Brazilian Ju-Jitsu black belt nei mi 10 aia tlem zingah Mizoram mi pakhat kan tel ve a. Mizoram lamah pawh MSSC hnuaiah affiliation dil mek a ni.
