Aieng Metric Ton 71 (KG 71,600) Kolasib leh Mamit District atanga lei vailiam.
Vawiin khan MzSRLM hnuaia din Ropuiliani Women Farmer Producer Company Limited (FPC) chuan a shareholders te tharchhuah Aieng Metric Ton 71 (KG 71,600) Kolasib leh Mamit District atanga a leisak chu, Lalmuanpuia, District Mission Director/Project Director, DRDO Kolasib District chuan Kolasib DC Office Complex atangin a vailiam.
He flag off programme hi Dr. Doris Lalrinawmi, Block Mission Director/Block Development Officer, BMMU, Thingdawl R.D Block chuan a kaihruai a. Lalmuanpuia chuan Mizoram State Rural Livelihoods Mission (MzSRLM) hnuaia agri-marketing value chain atana din Ropuiliani Women FPC in Kolasib leh Mamit District huamchhunga a shareholders te hnen atanga a leisak Aieng MT 71 zet, SSB AGRO LLP, Mizoram hnena hralhchhuah a ni chu lawmawm a tih thu a sawi a ni.
Ropuiliani Company chu kuthnathawktu Self Help Group (SHG) te tana innghahna tlak ni ngei tura Ministry of Rural Development-in a din a nih thu sawiin, MzSRLM chu he company bultantu an nih thu Lalmuanpuia chuan a tarlang a. SHG te hi mi taima tan chuan chhungkaw eizawnna nghahchhan nghet a nih theih thu leh, sorkar flagship programme-ah pawh sawhthing, aieng leh hmarcha te hi kuthnathawktute tharchhuah zara ramin hma a sawn theihna tur atana tum ber a nih thu a sawi bawk. Hengte hi hlawhtling thei turin Ropuiliani company chuan ruahmanna mumal tak a nei a, a thawktute pawhin a puitlin nan theihtawp chhuah turin a chah a ni.
Ropuiliani Women Farmer Producer Company Limited hian tun dinhmunah District 7 leh R.D Block 16 huam tel tawhin, shareholders (SHG) mi 9,500 chuang an inziaklut tawh a. An member-te hnen atang hian sawhthing leh Mizo hmarcha te lo leisak tawhin, tun dinhmunah Aieng leh sawhthing District dang atanga lei leh turin ruahmanna kalpui mek a ni. He company hian heng thlaite hi a hringa hralhchhuah piah lamah, Company Processing Unit, Chhingchhip-ah value addition kalpui mekin hmalak chhunzawm zel tum a ni.
