Aizawl District-ah Voter 292785 an awm, Hmeichhia 19359 in an tam zawk.
Vawiin January ni 25 khan India ram pumpuiah National Voters’ Day (NVD) hman a ni a. Mizoram district hrang hrangah pawh hman niin, a hun pui ber chu SP Conference Hall, Aizawl-ah hman a ni a. Kumin thupui chu ‘My India, My Vote’ tih a ni.
Voter naupang zawkte ram hruaitu thlannaa nasa zawka tel tura chawh phur nan sorkar laipui chuan January ni 25, 2011 khan Election Commission of India din ni (January ni 25, 1950) champhaphakah National Voters’ Day hi a hmang tan a. Kumin hi hman a nih vawi 16-na a ni.
Vawiin-a Aizawl-a NVD 2026 puala hun hmanah hian Dr. Lalrozama, Chief Electoral Officer, Mizoram chuan thu sawiin, voter tharte chu an vote dik taka hmang ngei turin a fuih a. Democracy leh election reng reng chu mipui avanga hlawhtling a ni tih sawiin, India democracy chuan mi chi hrang hrang inang lo tak tak a huam avangin ram hruaitu thlanna atana inrelbawlna (electoral machinery) tha neih a pawimawh a, election chu thianghlim, felfai, langtlang, mipui rinkai leh huap zo (inclusive) a ni tur a ni tih a sawi a. Hemi atan hian electoral roll dik leh thianghlim a ngaih thu leh BLO-te pawhin mapping an kalpui mek a, 87% vel zawh tawh a ni tih a sawi bawk.
He hunah hian Electoral Registration Officer (ERO) te, Assistant ERO te, Booth Level Officer (BLO) te bakah voter tharte leh sawm bik NGO, kohhran, political party-te leh thuthar lakhawmtute an tel a.
Er. Lalhriatpuia, District Election Officer, Aizawl District chuan hun kaihruaiin, NVD hman tan a nih dante leh he niah hian kum 18 tling tharte’n India rama democracy chawi nun a nih zel theih nana ram hruaitu tha an thlan theih nan awareness programme hman a nih thin thu a sawi a. Aizawl District chungchang a hnuaia ziak ang hian a tarlang bawk:
AIzawl District-ah hian MLA constituency 12, Electoral Registration Officer (ERO) awm zat 12, Assistant ERO awm 6, Polling Station 324 leh Block Level Officer (BLO) 324 a awm a. Voter 292785 an awm a. Voter zinga mipa awm zat 136713, Voter zinga hmeichhe awm zat 156072 a ni a. Electoral roll revision hnuhnung ber (January 2025) atanga vawiin thlengin voter thar 1219 an awm a ni.
