ZPM party thuchhuah tarlan dan chuan, nizan khan ZPM Vice Pesident Pu C. Lalnunnema leh General Headquarters hruaitu ṭhenkhat ten Aizawl khawpui chhung kawngpui thawmṭhat hna thawh mêk an tlawh a. Hna viltu PWD te chuan tlawhtute hi lo dawngsawngin, nizan khan Bungkawn leh Nursery inkar thawh a ni a, mipui hriat atana pawimawh te an lo sawi bawk a ni.
ZPM Vice Pesident chuan, Chief Minister leh PWD Minister te ṭhahnem ngaihna zârah Aizawl khawpui kawngpui thawmṭhat hna lian ber an kalpui thei tih a sawi a. Thawktute chawl lova zan tairek thlenga viltu PWD te chungah an lawm tih an sawi bawk.
Aizawl Road North leh Road South PWD hna vilnaa a khaikhawmtu ber Lalrinngheta, SE, Central Circle chuan tuna hna hi Aizawl kawngpui resurfacing project awm tawha lian ber a ni, a ti a. Km 83 thawmṭhat a ni dawn tih sawiin, hna hi kum 2024-25 hmalakna niin, nikum April aṭang khan contractor-in a thawk ṭan a. Kum 2025-26 hmalakna-in km 20-30 hna a awm leh mêk tih a sawi bawk.
Bungkawn aṭanga Nursery thawh zawh a nih hnuin Maubawk thleng meter 600 hna thawh chhunzawm a ni dawn a. Hnathawktu hi NIDIH, Silchar an ni a. Anni hian Aizawl kawngpui thawmṭhat hna 'package' hniha ṭhen chu hmun hrang hrangah an thawk mêk a ni.
