AMC inthlan chuh tum mi 68 zingah inhnukdawk an awm lo.
Nimin Ni 30, March 2026 Thawhtanni kha Aizawl Municipal Corporation ward 19-a inthlannaa chuh tumte tan inhnuhdawhna ni hnuhnung ber a ni a. He inthlan chuh tuma hming pe lut candidate 68 zingah inhnukdawk an awm lo.
State Election Commission chuan AMC inthlan vote thlak ni atan April ni 21 a ruat a, vote tla te hi April ni 27-ah chhiar a ni ang. Kar kalta Zirtawpni khan AMC inthlana chuh tura hming pe lut mi 68-te nomination endik a ni a. Candidate 68-te chuan endikna an paltlang vek a. Inhnuhdawh theih hun hnuhnung ber nimin tlai dar 3 thleng khan candidate zingah inhnukdawk an awm lo a ni.
AMC inthlan lo awm turah hian rorel lai ZPM, bakah MNF leh MPCC te chuan bial 19 an chuh kim vek a. BJP in bial 11-ah candidate an nei thung a ni. Independent candidate an awm lova, AMC bial 19 zinga bial 6 chu hmeichhe tan chauha chuh theih tura ruat ni mah se, tu pawhin a chuh theih bialah hmeichhe candidate 7 an awm a, tun tum AMC inthlan chuhtu mi 68 zinga 28 te chu hmeichhia niin, INC leh ZPM-ah hmeichhe candidate 9 ve ve, MNF-ah 7 leh BJP-ah 3 an awm a ni.
AMC inthlan lo awm turah hian vote nei mi 237846 an awm a. Polling station 257 awmin a tul anga auxiliary polling station siam belh a ni ang. Inthlanna atan hian vote thlakna khawl EVM hman a ni dawn a ni.
