AMC inthlan thlirlet. AMC Term oath-taking an lak ni atanga chhiar tur. MCC bawhchhia a puh report 6 lutte chu zirchian a nih hnuah thutling lova ngaih vek a ni.
Vawiin 30.4.2026 (Ningani) khan State Election Commissioner Dr. H. Lalthlangliana kaihhruaina hnuaiah Aizawl Municipal Corporation inthlanpui 2026 thlirletna neih a ni a. SEC hian inthlanpui boruak muanawm tak hnuaia neih zawh a nih avang leh tluang taka result chhiarna hun neih a ni chu lawmawm a tih thu a sawi.
SEC chuan MPF leh Political Party ten tha taka an thawhpui avanga lawmthu sawiin, sorkar hnathawk inthlan kaihhnawiha mawhphurhna nei zawng zawng ten an chanpual tha taka an hlen avangin lawmthu a sawi bawk a, election officials duty tura ruatte zingah an duty laia tawhsual tawk an awm lo leh rilru leh taksa emaw chhungkaw lam emaw harsatna avanga thlak ngai an awm lo chu Pathian kaihhruaina a ni tih sawiin, Model Code of Conduct chu he thlirletna hunah hian a tawp nghal thu a sawi a, AMC term intanna hi District Magistrate hmaa oath-taking an lak ni atanga chhiar tur a nih thu a sawi bawk.
Commissioner hian tum danga la tih ngailoh tun inthlanpuia an hmalakna hrang hrangte a tarlang a, chung zingah chuan home voting hlawhtling taka an kalpui thei te, SEC Office-a Persons with Election Duty (PED) ten vote thlak a ni ta te leh EVM-a vote chhiar theih loh harsatna thleng tha taka chinfel a ni thei te chu lawmawm a tih thu a sawi a.
Tun tum AMC inthlanpui ah hian Ward – XIX/6 Hlimen – 1 ah vote tla tha ber in, vote nei zawng zawng atanga za zelah 77.72 in an thlak a, vote tlak chhiatna ber chu Ward – II/3 Bawngkawn – VIII Polling Station-ah niin, vote hi za zelah 39.30 a tla a ni. Vote tamna ber ward hi ward no. – XVIII niin, voters 18906 an awm a, voters tlemna ber ward no. VIII ah vote 7975 a awm a ni. Candidate zawng zawnga vote hmu tam ber chu ZPM Candidate K. Lalrodinga( Ward – XVIII) a ni a, vote 5899 a hmu a, a chak ber leh a dawttu inthlauhna tam ber chu Ward-IV ah niin ZPM candidate Vanlalhriatrengi’n amah hnaih bertu MNF candidate R. Lalnunthari chu vote 2121 in a hneh a ni. Candidate te kum chawhrual hi kum 50 niin thlantlinte kum chawhrual hi kum 49 a ni a. Candidate tling zinga upa ber Pu V.L. Zamlova( Ward – XV ) hi kum 69 mi niin, candidate tling zinga naupang ber chu Christina Roluahpuii Sailo( Ward – VIII) niin, kum 31 mi a ni.
Inthlan vuakvetah khan MCC bawhchhiatna vawi 2 awmin chinfel a ni a, MCC bawhchhia a puh report 6 lutte chu evidence nen uluk taka zirchian a nih hnuah thutling lova ngaih vek a ni. Veng tamna ber ward hi Ward-XVIII niin veng pariat a awm a, veng tlemna ber ward hi ward paruk niin chungte chu – Ward No. V, VI, VIII, XII, XIII leh XVI te an ni a, veng pathum theuh an awm a ni. Candidate thlan tlinte zingah Post-Graduate – 7, Graduate – 10 leh Under graduate (ClassXII) – 2 an awm a, Under Matric (HSLC) an awm lo a ni.
Thlirletna hunah hian MPF lam aiawh te, Political Party hrang hrang aiawh ten inthlan tha taka zawh fel a ni ta chu lawmawm an tih thu sawiin, hmasawn ngaihna lai hrang hrangte sawihona hun hman a ni bawk a ni.
