CADC huamchhung-a NGO hrang hrang ten, Central YLA in ramri lung a phun chu rang taka thiat tura thupek chhuah turin Larsap an ngen.
Vawiin ni 20 April, 2026 khan Chakma Autonomous District Council (CADC) huam chhunga Civil Society Organization hrang hrang aiawh te chuan thuchhuah siamin, Central YLA ten Parva-I a ramri lung an phun chungchang-ah, CADC huam chhunga Civil Society Organization hrang hrang aiawh ten, Larsap chu hmalakpui tura ngenna lehka an pek thu an sawi.
An thuchhuah-ah chuan, 18 April, 2026 khan Central Young Chakma Association (CYCA) huaihawt a inhmuhkhawmna-ah, CADC hnuaia political party aiawhte leh NGO hrang hrang Mizoram Chakma Students’ Union, Chakma Mahila Samiti, Teachers’ Association, Employees’ Association leh Civil Society dangte chuan hemi chungchang hi uluk takin an sawiho tih an tarlang bawk.
Meeting chuan Chakma Autonomous District Council (CADC) leh Lai Autonomous District Council (LADC) inrina chu Pawi-Lakher Region (Re-Organization) Order, 1972 in chiang takin a lo bituk tawh tih an sawi a. Chu Order ang chuan ramri chu Sanghatuilo Lui hnar bul tuikhur hmasa ber aṭanga, Tuichawng Lui nena an infinna thlengin a kal a ni a. Chu vang chuan Parva-I, Parva-II, Parva-III, Bundukbanga, Gavasury, leh Siminesora khuate hi CADC huam chhunga awm an ni, an ti.
Larsap hnenah hian mipui ṭhenkhat chuan he lungphun hi thiah mai an duh thu sawiin, Parva leh Devasora South bialtu MDC ten mipuite chu insum tur leh thuneitute thutlukna nghak tur a an ngen thu an sawi a. He thil hi chinfel thuai a nih loh chuan buaina lian zawk a chhuah an hlauh thu an sawi bawk a ni.
CADC hnuaia Civil Society hrang hrang leh political party aiawhte chuan inremna vawn nun leh dan rorelna humhimna atan Larsap chuan a hun taka hma a lak ngei an beisei thu an sawi bawk.
