Chief Minister in link road leh One Stop Solution a hawng
Vawiin khan Chief Minister Pu Lalduhoma chuan Buhchangphaia Oil Palm chinna panna kawngpui Ramthar Zau Oil Palm Link Road leh Bukvanneia Godrej Agrovet ten Oil Palm chingtute tana mamawh engkim man tlawm zawka an leina tur Samadhan Centre, One Stop Solution an din thar chu hawng.
Oil Palm Link Road hawnnaah hian thutawi sawiin Chief Minister chuan, Oil Palm hi Prime Minister-in a ngaipawimawh hle a, DoNER Minister pawhin a sawi ri fo bawk a. Chuvang chuan, oil palm lama hma kan sawn theih nan kan ngaihtuahna kan seng nasa a, link road pawh kan laih belh zel dawn a ni, a ti.
Link road a hawn hi kilometer hniha thui niin concrete pavement a ni a, Rs. 110 lakh sen ral a ni. He zauah hian chhungkaw pakuain huan an nei puitling tawh a, nikum khan Rs. 45 lakh man an hralh a. Chhungkaw dang 15 in an ching thar leh mek bawk.
Godrej Agrovet One Stop Solution hawnnaah hian Chief Minister chuan, kum 2024 July ni 13 khan Mumbai-ah Pu Rakesh Swamy, Godrej Group President nen kan inkawm a, Bukvannei Mill tihchangtlun dan tur hi kan sawi dun a, Samadhan Centre din ve ngei turin ka ngen a. Oil Palm chauh ni lovin Sapthei Processing te, Sangha chaw siamna te, Ar vulhna lian tham din thu te, Sahbon leh Glycerin siam thlengin kan sawi dun a. Ka ngenna ngaipawimawh a Samadhan Centre pahnih, Bukvannei leh Bawngvaa min rawn tihpuitlinsak hi mimal tak pawhin ka lawm hle a ni.
Kum 2005 atang khan Godrej Agrovet Limited (GAVL) hian Mizoram sorkar hriatpuiin Oil Palm chingtute thawhpuiin hma a la tan a. Kolasib leh Mamit district pahnihte enkawltir bik an ni a. Mizoram chhim lamah Patanjali Food lam ten tha tharin an rawn bei ve leh bawk a.
GAVL hian kum 2014 khan Oil Palm hriak herna khawl an din a, darkar khatah Oil Palm rah 50 quintals (5 MT) a her thei a. An mamawh khawp her tur an hmu zo meuh lova. Farmers ten hlawk zawka an tharchhuah theih nan One Stop Solution hi a tangkai dawn a ni, a ti.
Pu Lalruatkima, Sr. Executive, GAVL chuan One Stop Solution chanchin tlangpui a sawi a. OSS ah hian Oil Palm farmers-te mamawh zawng zawng, fertilizer te, pesticide leh insecticide te, tui pekna hmanrua te, a lawhna te leh thil dang tam tak man tlawm zawka lei theih turin chhawpchhuah a ni dawn a. Fertilizer bikah hian MRP a hralh theih turin ruahmanna an siam a. Farmers leh Official-te tan training centre changtlung tak an siam bawk a. Oil Palm chingtu an pun dan a zira la din belh zel pawh an inhuam a ni.
Godrej Agrovet hian Mizorama an inbun ata vawiin thlengin Oil Palm hi Rs. 54 Crore man vel an lei tawh a. Tun 2025-26 Financial Year chhungin, December thla thleng khan Ton 5807 an lei tawh a, Rs. 9.57 Crore an seng tawh a ni.
Chief Minister hi Pu PC Vanlalruata, Minister, Agriculture & Farmers Welfare, Pu Lalfamkima, Dy. Speaker leh bialtu MLA, Pu Lalmuanpuia Punte, MLA, Adviser to CM leh official pawimawhten an tawiawm a ni.
