Vawiin khan Chief Minister Lalduhoma chuan Sairang Horticulture Centre-a Mizoram Agricultural Marketing Board-in Bana kaih (Handholding) Scheme hnuaia a din, Ginger Processing Unit chu a hawng a. Horticulture Minister C. Lalsawivunga'na tawiawm bawk.
Chief Minister chuan, kum tam tak chhung kan lo vei tawhte a takin a chang chho mek a, a lawmawm hle mai. He processing unit dinna kawnga mawhphurtu MAMB leh Horticulture department chungah lawmthu ka sawi a ni, a ti. UT kan nih a chin kum 54 vel a lo ni tawh a, loneia eizawng tamna ram ni chungin eng thlai mah hi kan la hmingthanpui ngai lo a. Tunah chuan Mizoram chu Ginger Capital of India tia hriat kan ni chho tan ta a. Kan loneitute thawh rah zarah kan hmingthang chho mek a. Sapthei pawh hi nasa taka kalpui a thain kan hria a, larpui thama ngah kan tum leh dawn a ni, a ti.
Mizoram Agricultural Marketing Board (MAMB) chuan Sairanga Horticulture Centre hmun hma leh building thenkhatte chu private company hnenah sawhthing process nan outsource turin October ni 17th 2024 khan Expression of Interest (EOI) a chhuah a. EOI chhang tute zing atang hian Good Faith, Saron veng te chu thlan chhuah an ni a. Anni hnenah hian Mizoram Agricultural Marketing Board chuan Horticulture Centre-a heng building, Transit Godown, Integrated pack house, Manager quarters leh Chowkidar quarters te hi MOU fel taka ziak in kum 5 chhung atan 13th January, 2025 khan a hlan a ni.
Dr. David Fangzauva, Deputy Manager, MAMB chuan technical report a pe a, sum ruahman Rs. 71 lakh atangin Rs. 61 an hmang tawh a, hmabak tlem an la nei a. A processing unit hi chu vawi tam tak an lo ti chhin tawh a, fel taka kalpui theih a ni. A silna khawl chak tak bakah Electric hmanga a tihrona khawl, batch khatah kg 200 zel tiro thei a awm a. Electric chauha tihro a nih chuan a tihrona man a san dawn avangin Ni zung chakna hmanga vawi khata kg 2000 tihro theihna a awm tel. Sawhthing ro hralhna hi a that avangin a tihrona khawl chak leh lian zawk mamawhna a sang hle nia sawi a ni.
