CM-in National Defence College Zirlaite kawm.
Vawiin khan Chief Minister Lalduhoma chuan a office-ah Ministry of Defence hnuaia awm, National Defence College-a intuaihriam mek India leh ram dang sipai officers, Mizoram rawn tlawha lo zin mekte chu a kawm.
Chief Minister chuan, Understanding India Study Tour neia Mizoram tlawha lo zin sipai officer te hi lawm thu a lo hrilh a. Mizoram chu state ralmuang, ziak leh chhiar thiam vekna, eirukna tlemna, khualzinten nasa taka an tlawh mek a nih thu a hrilh. Aizawl chu lirthei tam hle mah se khawpui reh riai mai a ni a, hmeichhia leh naupangte tan pawha khawpui ralmuang tawk tak a ni. Tin, in kal velnaah kawng sirah Nghahloh Dawr in hmuin ka ring a. Nghahloh Dawr hian kan ram ralmuanzia a tilang ve a ni, a ti.
Digital Governance lama India rama hmahruaitu nih tuma sorkarin ke a pen mek dan te, kum 2047 -a India GDP a 1% thawh phak ve tuma Mizoram sorkarin hmathlir a neih thute leh hriat duh dang an neihte a hrilh a. An cham chhunga hun nuam tak hmang turin duhsakna a hlan a ni.
Sipai Officer-te hian Mizoram an hmuh dan Chief Minister hnenah sawiin zawhna an neihte an zawt bawk a. Ram mawi tak a nih bakah a ralmuang a, mipuite an nelawm a, Mizoram hian tlawhtu a la ngah deuh deuh dawn a ni, tiin nuam an tih thu an sawi hlawm a ni.
NDC course kal laite hi Brigadiers leh Jt. Secretary tlukpui Army, Navy leh Air Force a mi te, India thian tha ram thenkhat (Friendly Foreign Countries) atanga rawn kal sipai officer te an ni a. AMV MV Patel, VM, SDS (Air), Faculty Incharge, NDC chuan a rawn kalpui a. An cham chhungin Mizoram sorkar hotulute an kawm ang a, hmun thenkhat an tlawh bawk ang. An cham chhung hian C. Lalremruati, MIS, Protocol Officer chuan a kaihruai dawn a ni.
