Dampa Bial by-election lo awm tura Chief Minister Lalduhoma leh Adviser to Chief Minister Dr. Lorrain Lalpekliana Chinzah te’n Model Code of Conduct an bawhchhia nia puhna ah an in sawifiah tawh a, hmalak zel dan tur ngaihtuah mek a ni.
Dampa bial by election lo awm tura Returning Officer, MCC Nodal Officer ni bawk Malsawmzuala chuan karkalta Zirtawpnia MNF Legal Board hnen atanga Chief Minister Lalduhoma leh Adviser to Chief Minister Dr. Lorrain Lalpekliana Chinzah ten MCC an bawhchhia tih puhna an dawn chungchangah ZPM lam atanga insawifiahna an dawng tawh a, hmalak zel dan tur an ngaihtuah mek niin a sawi.
Hetihlai hian AAP Mizoram chuan nimin khan thuchhuah siamin, October ni 3-a PWD changtu Minister Vanlalhlana’n Phuldungsei khuaa a campaign naah North East Special Infrastructure Development Scheme (NESIDS) hnuaiah Pukzing leh Silsury kawng, truck kal theihna a siam tura awm vek tawh, ZPM candidate Vanlalsailova a tling lo a nih chuan ngaituah nawn a ngai leh tur angin a sawi niin an sawi a.
Hei hian Dampa bial mipui te rilru a ti chi-ai chuan The representation of the People Act, 1951 leh The model code of conduct chiang takin a kalh an ti a, India Constitution hnuaia Article 19 (1) (a) a tiderthawng bawk tih sawiin, Election Commission of India hnenah hrem a nih ngei theih nan leh mipui a tithaih te thlavang hauh nan Deputy Chief Electoral Office James Miahlung hnenah thubuai an theh lut tih an sawi a ni.
October ni 6 khan Election Commission of India (ECl) chuan Dampa Bial MLA by-election neih hun atan November 11, 2025-a ruat tih a puang a, model code of conduct hman zui nghal a ni. ( Thu lakna AIR Aizawl)
