Court lehkha lem hmanga Jail atanga 16 chhuah tir tu a puh police ten darkar 72 an kawl leh dawn.
Court lehkha lem hmanga tunhnaia Lunglei District Jail atanga mi 16 chhuah tir an nih chungchanga mawhphurhtu a ngaih, Jeremy Lalthangtura chu Lunglei Police ten Darkar 72 an kawl hnuah nimin khan Court-ah in lanin, Court chuan Darkar 72 dang kawl phalna a pe leh a, A ni bakah hian Court chuan Jeremy-an Bank Account a hman hawh sak, Laltlanhlua pawh Darkar 72 chhung Police in an kawl a rem ti bawk.
Darkar 72 dang hun an dil belh leh chhan kan zawhna chhangin, Lunglei Police chuan thu an zawh fiahna-a Jeremy Lalthangtura thu sawite chu a dik ngei em tih finfiaha an chhui zui zel thu leh District Jaila tang laite pawh thu an zawh fiah leh zel thin thu an sawi a, hetiang a nih avang hian hun an mamawh rei phah hle tih sawiin, Jeremya’n Bank Account a hman sak, Jail tang Motor Driver Laltlanhlua pawh kar kal ta Zirtawp Ni khan an man thu leh thu an zawh fiah mek thu an sawi a, tun dinhmunah a account a pawisa luh dan leh a chhuahna te chu enfiah hmabak a nih thu an sawi bawk.
Court lehkha lem ni ngeia hriat hman a nih avanga Jail atanga chhuah tir zingah hian Lunglei Police te chuan 1. Rochungnunga Sethlun, 2.Lalbeiseia Venghlun, Lunglei 3. Lalkhawpuimawia Venghlun Lunglei, 4. PC Ramnunmawia Rahsiveng, Lunglei 5. ZD Lalrammawia Hauruang. 6. Lalchhuanmawia Electric Veng Lunglei, 7. Biakhmingthanga Venghlun Lunglei 8. HD Zoramchhana Farmveng Lunglei, 9. Laltlanzuali Champhai 10.Ramdinsanga Hnahthial Bazar leh 11. Reena Rai Champhai te an man tawh a, man loh mi 3 la awmin heng mi 3 te hi 1. Zakir Hussain Karimganj, 2. Vanbawiha New Vengpui Lawngtlai, 3. leh Jogola (Muana tia koh) Putlungasih te an ni a, lehkha lem nia hriat hman avanga Jail atanga chhuah tir zingah hian TC Lalmuansanga Chanmari Lunglei chu boral tawhin, Lalhriatpuia Vanhne Lunglei Dist erawh chu Khawzawl Police Station hnuaia thubuai nei a nih angin Champhai District Jailah a tang mek thung a ni.
