Dar 2:00 PM khan ZPM Thalai President Jeje Lalpekhlua MLA hovin Bridage field an endik.
Vawiin Ni 13, 4, 2026 (Thawhtan) chawhnu dar 2:00 PM khan ZPM Thalai President Jeje Lalpekhlua MLA leh phungbawm a sawm ten Brigade field-a sum hmanna dik lo a awm leh awm loh a hmunah an endik a. Endik puia an sawm MNF Thalai President Robert Romawia Royte MLA erawh a telve lo.
ZPM Thalai chuan April Ni 6, 2026 (Thawhtan) khan thuchhuah siamin, ZPM Thalai General Headquarters OB Meeting chuan, MNYF President Robert Romawia Royte Hachhek Bialtu MLA chu AMC Play Ground Brigade Field enho puiah an sawm a. April Ni 6, 2026 hian OB Meeting pawimawh tak an President Jeje Lalpekhlua South Tuipui Bialtu MLA ho a an neih thu an sawi bawk.
ZPM thalai OB Meeting chuan, Tun hnaiah MNYF President Robert Romawia Royte chuan Press Conference neiin, AMC Play Ground Brigade field-ah sum hmanna dik lo a awm lo anga a sawina chu, veng mipuite leh thalai infiammite zah lohna-ah ZPM Thalai Gen. Hqrts. chuan an ngaih thu an sawi a. ZPM Thalai OB Meeting Chuan MLA zawhawm tak Robert Romawia Royte hian a hman hun leh ni te ZPM Thalai min rawn hriattir se la, A ma ho ngei a Bridage field siam dan va en ho puiah an sawm nghal bawk a ni, an ti a.
ZPM Thalai President hian, MNF Thalai President hnenah hian endik ho tura a rawt hun leh darkar bakah endik dan tur-a ruahmanna a siam chu thlak danglam tur a rawtna ziakin a pe a, heng an rawtna siam dan hi a in hmu fuh lo ni a ngaih theih a ni a. Party pahnih Thalai President te hian a rualin an en dun thei ta lova. ZPM Thalai President hova an endikna kimchang hi rawn dah leh a ni ang.
