FCI kudam parukah buhfai metric ton sing hnih chuang chhêk khawl a ni
Food Corporation of India (FCI) hotute chuan, Mizoram-a FCI kudam parukah buhfai metric ton sing hnih chuang (20,573.45) chhêk khawl a ni an ti a. Mizoram sorkar chu FCI hotute ILP exemption an pekna huang zauh tura an duh thu an sawi bawk.
Tun hnai khan FCI Aizawl Division manager Bankim Phonglo chuan chanchinbu mite a kawm a, Mizoram-ah FCI chuan buhfai metric ton 31,842 lenna kudam paruk an nei tih sawiin, hei bakah hian Sairangah metric ton 10,000 lenna tur kudam an sa mek a, kumin December velah peih hman an beisei.
Mizoram-a FCI Kudam paruk Bairabi, Kolasib, Bualpui, Aizawl, Lunglei leh Lawngtlaiahte Bairabi-a rêlin a rawn phurh luhte aṭangin buhfai phurh kual ṭhin a ni a, Sairanga kudam peih a nih hunah Sairang aṭangin Aizawl, Lunglei leh Lawngtlaia FCI kudamahte buhfai sem kual a ni tawh dawn niin a sawi bawk. Bankim Phonglo chuan, Mizorama FCI hotute leh Regional Office, Shillong hotute tan Mizoram sorkarin ILP ngaihhnathiamna (exemption) an pek avanga an lawm thu a sawi a; hmun hrang hranga FCI officialte tan pawh ngaihhnathiamna pek ni se an duh thu sawiin, a bikin Mizoram nena innghêng reng Guwahati-a Regional Office leh Delhi-a FCI Headquarters lama an hotute Mizorama thil pawimawha an rawn kal dawnin ILP an dil zel a ngai a, a buaithlak châng a awm thin niin a sawi bawk.
FCI hotute sawi danin, tunah hian Mizoramah Open Market Sale Scheme-Domestic (OMSS-D) kalpuitu mimal/pawl pali an awm a, October ni 23, Ningani dinhmun angin Mizorama FCI kudam parukah buhfai MT 20,573.45 leh wheat MT 1,810.24 a awm mek a ni. Thu lakna (AIR Azl)
