Chief Minister Lalduhoma chuan, Finance Commission 16-na rawt dan angin sorkar laipui chuan kum 2026-2027 budget a pharh niin a sawi.
Social media kaltlang a hemi chungchang a sawina-ah Chief Minister chuan, FC 16-na-in Mizoram an rawn tlawh tuma Horizontal Devolution Criteria leh weightage atana Mizoram sorkar rawtna za-a sawmriat vel dawn chu a pawm tih a hmuh theih niin a sawi.
Horizontal Devolution-a Mizoram chan tur hi FC 15-na-ah za zela bial point 5 a nih laiin, FC 16-na-ah chuan za zela bial point 564-ah an rawn tisang a ni, a ti a. FC 16-na hun chhung, tangka kum 2026 leh 2031 inkara a Mizoramin central chhiah atanga a chanpual dawn tur chu a pung dawn tihna a ni, a ti a. Mizoram chan tur zat pung ta hi a za zela chhutin lang tam lo mahse a sum hrawm a len avangin a sumfai ang chuan a tam tham viau ang, a ti bawk.
Kum tina Mizoram sum hmuh tur hi a hma aiin cheng vaibelchhe 1,500 velin a sang tawh zawk dawn ni a sawiin, Finance Commission thil kalpui dan hmanga sum ruahmanna siam thenkhat SASCI leh a dangah te pawh Mizoram chanpual hi a tam phah thei dawn a ni, a ti a. Chief Minister chuan, hmar chhak state zinga horizontal devolution share pung state tlemte zinga Mizoram a tel ve hi a lawmawm hle a ni, a ti bawk.
Hei bakah hian Chief Minister chuan, Village Council leh Local Council te tana ruahmanna hranpa Rural Local Body Grant leh Urban Local Body Grant te hi an titawp mai ang tih kha sorkarin a hlauh avangin kalpui chhunzawm zel turin an ngen a. Sorkar ngenna ang takin hei pawh hi an awmtir zui ta zel niin a sawi a. Finance Commission 16-na a Mizoram sorkarin rawtna a siamte chu an bawhzui nasa hle a, Mizoram an rawn tlawh lai a theihtawp chhuah a nih bakah an haw hnu-ah pawh Delhi lamah inkhawm an zuk huaihawtpui a ni, a ti.
Chief Minister chuan, FC 16-na hnena Mizoram sorkarin Memorandum thehluh tak, fel fai leh zahawm tak buatsaihtu Finance officials-te chungah lawmthu a sawi a. A bik takin Lalhmingmawia, MFAS, Addl. Secretary, Finance Department leh a hote hian an hahpui zual a. An chungah lawmthu a sawi a ni.
