LPG & POL Dinhmun chungchanga Chief Secretary thuchhuah.
Sorkar Laipui chuan Ministry of Petroleum & Natural Gas (MoPNG) kaltlangin ram chhung hmun hrang hranga LPG leh Petroleum Oil lakluh leh sem chhuah dan chu uluk takin a thlithlai reng a. MoPNG chuan State sorkar zawng zawngte hnenah hmun hrang hranga he'ng nitin ei leh bar mamawh (essential commodities) tlachham an awm loh nan khauh taka vil reng turin thupek a chhuah bawk a ni.
March ni 27, 2026 khan Prime Minister hova State hrang hranga Chief Minister leh Chief Secretary-te thutkhawmnaah mipuite mamawh lakluh leh sem chhuah dan uluk taka en zui reng a pawimawhzia uar taka sawi a ni a. LPG leh POL stock tam tawk tak a awm a ni tih leh ngaihthat loh emaw chiaina chhan tur a awm lo tih mipuite hriattir an ni.
March ni 28, 2026 khan Chief Secretary, Mizoram hovin Food, Civil Supplies & Consumer Affairs Department (FCS&CA) hotute, Deputy Commissioner (DC) zawng zawngte leh Oil Marketing Company (OMC)-te an thukhawm a. DC-te hian an district chhung theuhvah LPG, Petrol leh Diesel stock tam tawk tak a awm tih an sawi a ni.
Chief Secretary chuan DC-te chu LPG leh POL stock awm zat leh sem chhuah dan uluk taka vil a, chhek ruk (hoarding), man to zawka hralh (black marketing), leh kawng dik lova lak pen a nih loh nana hma la turin a hrilh a. District hotute chuan dan bawhchhia an awm a nih chuan Essential Commodities Act, 1955 hmangin an lakah hremna khauh tak an lekkawh tur a ni.
Mipuite chuan LPG leh Diesel/Petrol sem chhuah chungchanga harsatna an tawh emaw chhek ru (hoarding) leh man to zawka hralh (black marketing) an hriat chuan State leh District hotute'n helpline number an siamah an thlen tur a ni.
Mipuite chu LPG stock awm sa renchem taka hmang tura chah an ni bawk e.
