MICLUN in kuthnathawktute tana sorkar hmalakna duh khawp lo
Vawiin khan MICLUN General Headquarters chuan thuchhuah siamin, Mizoram sorkarin kuthnathawktute tana hma kan la an tihna chu ngun tak a an zir mek thu an sawi a. Hun rei tawh tak atangin, Mizoram ah Vawk pul hri hlauhawm tak, African Swine Fever (ASF) in min tuam a, nikum 2024 chhung ngawt pawh khan vawk 10,000 chuang lai a thi tawh a. MICLUN chuan Mizoram sorkar chu vawkvulhtu, kuthnathawktute zangna dawmna pe ngei turin kan lo ngen tawh a. Mahse tun thlengin, Mizoram sorkarin vawk vulhtu kuthnathawktute hnenah zangna dawmna a la pe lo hi, pe ngei turin kan phut tlat a ni, an ti.
MICLUN chuan MNF sorkar kalta khan Covid-19 hripui nasa tak leng chungin, a term hun chhunga vawk pul hri tuarte vawk vulhtu kuthnathawktute hnenah zangna dawmna Rs. 10,48,42,200.00 lai a lo pe tawh a. Kum 2025-ah pawh vawkpul thi sang tam tak a awm tawh a zangna dawmna pe ve ngei turin, Mizoram sorkar an phut tlat tih an sawi bawk.
Sorkar-in Sawhthing a lei, kuthnathawktute hnena a la bat sak chu, pe thuai turin MICLUN chuan an ngen bawk a. Sawhthing lei chungchanga thil fello, cheng vaibelchhe 5 lai awm anga sawi awm chu a ti tu chu puangchhuak a, Action la ngei turin an phut tih an sawi bawk.
MICLUN chuan tunlaia Sazu puangin khaw 140 dawn lai ah, Kuthnathawktute lo leh thlai te, Sazu puangin a suasam a, kuthnathawktu tam takin, Buhseng tur pawh nei lovin, harsatna an tawk a. Heng mi te hnenah hian, Mizoram sorkar chu tanpuina pe turin an ngen tih an sawi bawk a ni.
