MJA General Headquarters chuan nimin khan kum thar, 2026 atana inhlanna tharna neih pahin thingpui in hona an nei.
Aizawl Press Club-a inkhawmah hian MJA General Headquarters President C. Lalrambuatsaiha chuan, Mizoram hmun hrang hranga MJA member-te kum thar chibai bukin, duhsakna a hlan a. MJA member zingah pawl thil tih leh hmalakna ngaipawimawh tawk lo an awm thin chu tha lo a tih thu a sawi a, MJA member-te chu pawl hmalakna ngai pawmawh thar a, midang tih turah dah mai lova, a theih chin chinah tel ve tum thin turin a chah a ni.
MJA President chuan, Journalist-te chu hnathawh hunbi pawh nei lova, a remchan ang anga khawsak chang an ngah avangin an hriselna ngai pawimawh turin a chah bawk a. A bikin an MJA member zingah zu kaihhnawih natna avanga harsatna tawk an awm leh thin chu thil pawi tak a nih avangin an hriselna ngaipawimawh chunga mahni inthunun tum deuh deuh turin a chah bawk a ni.
Inkhawm hi MJA Vice President C. Lalhmachhuana'n a kaihruai a. General Secretary, K. Zothanpara'n MJA chetvelna report a pe a, Pu K. Lalhruaitluanga'n hunserh a hmang a ni.
