MSU ten CM hnanah, MPSC Chairman bang ngam tura thurawn pe turin an ngen.
Vawiin June 8, 2026 (Thawhṭanni) chawhma khan MSU hruaitute chuan Chief Minister Lalduhoma chu a pisaah an hmu a. Mizoram Public Service Commission hnalakah thil tihsual awm ṭhin chungchangte, Hnam dang (vai) in Mizo hminga Official document atana hming thlak chungchang leh BSF hnaruaka Mizoram Quata hnamdangin document lem hmanga an zawm chungchang an thlen.
MSU hruaitute chuan Chief Minister hnenah hian Mizoram Public Service Commission inthlahdah avanga sorkar hnalakah buaina a awm fo chu ṭhalo anti a. Tun hnaia Jr. Grade of Legal Service hnalakah buaina thar a awm leh chu pawi an tih thu an thlen bawk. Mizorama hnalakna kan neih chhun leh Group A Officer thlenga post sang zawk latu MPSC berin tihsual an nei ta fo hi ngaihzam a har thu leh an ngaih thutak viau thu MSU chuan CM hnenah hian an thlen a. Hei vang hian MPSC Chairman hian a hnuaia hnathawkte a vilṭha tawkloah an ngaih vangin bang ngam tura thurawn pe turin an ngen a ni.
Tin, 27th May 2026 (Nilaini) Vanglaini chanchinbu chhuak phek 5-naah Hnamdang (Vai) Mizo hminga Official Document-a hman tur atana hming lo thlak an awm chungchang an thlen bawk a. Hetia hnam dangin Mizo hminga hming an thlak fo chuan ILP exempt tumna leh Tribal Certificate neih tumna ṭhalo tak a hrinchhuah theih avangin tihtawp anih theih nana hma laksak turin an ngen a ni.
Hemi bakah BSF a Mizoram Quata hnawhkhat tura Document diklo siamtu mi pariat tun thlenga man chhuah anla nihloh chungchang pawh thlen a, a ranglama Chief Minister hi hma laksak turin an ngen a ni.
Chief Minister chuan MSU te thil thlen chu pawimawh tak tak anih thu leh, theihtawpa Chief Minister aṭanga alo bawhzuisak tur thu a sawi a ni.
