Mizorama Political Party zingah BJP hmabâk a êng ber
Vawiin a BJP Mizoram Friday Political Session-ah Dr. K. Beichhua, MLA & State President chuan thu sawiin, "Mizorama Political Party awm zingah BJP hmabâk a êng ber a, India ramah BJP thli a tleh mek zel a, nasa takin hma a sawn zel a ni, a ti.
Dr. Beichhua chuan, Mizoram ah pawh Pathian zarah BJP chu hmasawn zawngin kan kal zel bawk nen, BJP hmabak hi a êng êm êm a. West Bengal lamah TMC kulhpui ṭhiah a ni a, Sorkar ṭha an duh avangin BJP Sorkar an nei ta a, chumai ni lovin, TMC MLA aṭanga BJP zawm an awm nual tawh bawk a ni, hei hian BJP ṭhat zia a ti lang chiang hle a ni tih a hriat a ni. Chuvangin, BJP Mizoram Member te tan lungngaihna tur a awm lo a ni," a ti.
Dr. K. Beichhua chuan sawi chhunzawmin, "Mizorama Sorkar hmalakna kan tih hrang hrangte hi thlir ila, PM Schemes kaltlang deuh vek a ni a, a ṭhenah PM Schemes kaihlek deuh te a ni hlawm bawk a. Chuvangin, mi retheite tana ding reng chu BJP kan nih angin, Mizoram ah Sorkarna chang phei ila chuan, vawiina Central aṭanga kan dawn ve hi chu a beitham em mai a, "a ṭhen pawh kan hre thei lo, he lui kam atang hian," tih hla kan sak ang chauh hi a ni hial dawn a ni, a ti.
Ṭhalaite hian kan hmakhua kan thlir a ngai ta hle a, kum tin lehkhathiam hna nei lo kan pung zel si a, Central-a kan hotute chuan ṭhalai mi sing telte tan eizawnna kan ngaihtuah sak ang min tih angin BJP hian Sorkarna kan chan chuan chumi tihlawhtling tur chuan hma kan la dawn a. BJP kan thawhpui loh emaw kan Sorkar tir lo a nih chuan a tuartu tur chu nang leh kei hi kan ni zel dawn a. Chuvangin mitinin kan chanvo tur ṭheuh kan chana kan hmuh theih nan BJP, Development thupuia neitu leh a taka thawk ṭhin party hi kan Sorkar tir a ngai a ni," a ti bawk.
