AMC Corporator (Lead Facilitator) ten Aizawl bawlhhlawh paihna hmun (Solid Waste Management Center, Tuirial) ah thing phun.
Aizawl, 11th June, 2026: Vawiin khan World Environment Day - 2026 denchhenin June ni 5 atanga an hmalakna kal zelah AMC Corporator (Lead Facilitator) ten Aizawl bawlhhlawh paihna hmun (Solid Waste Management Center, Tuirial) ah thing an phun.
Tree Plantation Drive hi World Environment Day 2026 hnuaia ‘Ek Ped Maa ke Naam’ programme initiative anga hman a ni a, Aizawl Mayor Pu H. Lalremtluanga leh Corporator leh Official ten an nei a. Aizawl Mayor Pu H. Lalremtluanga chuan leilung chhe zel veng turin thing phun uar deuh deuh a tul thu a sawi a. Solid Waste Management Rule tharin a phut angin chhungkaw tinin kan bawlhhlawhte chi 4-a thliar hran a ngaih thu sawiin hei hi a sawngbawl kawnga hna pawimawh hmasa ber a ni, a ti a. Bawlhhlawh thliar hran kawnga tan la thar theuh turin chhung tinte a ngen nghal bawk a ni. Tin, Solid Waste Management Rules, 2026-in a phut angin bye-law siam mek a ni a, peih fel thuai a ni dawn, a ti bawk.
AMC Mayor chuan Bawlhhlawh paihna hmun Solid Waste Management Center, Tuirial-ah bawlhhlawh paih fin leh vek anga sawi awm thin chu a dik loh thu a sawi a. A paihna hmun hrang mumal tak siamin a theih anga tam sawngbawl a nih thu a sawi a. Material Recovery Facility, Luangmuala siam mek peih fel a nih hunah phei chuan bawlhhlawh thliar hran kawngah nasa lehzuala ṭan lak a ngaih dawn thu a sawi bawk.
World Environment Day 2026 pual hian AMC chuan nasa takin hma a la a. Special meeting kovin bawlhhlawh thliar hran leh sawngbawl kawnga hmalakna turte sawi a ni a. Aizawl khawpuia bawlhhlawh sawngbawlnain hma a sawn theih nan AMC Corporator ten theihtawp an chhuah dawn a. Ward tinah bawlhhlawh thliar hran chungchang campaign an nei a, ni 12th June, 2026 (Zirtawpni) hian Ward tina tihfai ngai hmun pakhat theuh hnatlang kovin an tifai dawn bawk a ni.
