ZPM sorkar hi mipuite laka an intiamna ti hlawhtling loin, nasa taka an sawisel MNF sorkar thil tih tha lo te an rawn ti ve vek. Lalnunmawia Chuaungo
Vawiin June 12, 2026 Zirtawpni khan Mizoram Pradesh Congress Committee chuan Congress Bhavan-ah Political Session an nei a, MPCC Senior Vice President Lalnunmawia Chuaungo chuan thu sawiin, “Keini Congress Party-te hian ZPM sorkar that loh avang ngawtin mipui te hnenah kan kuta sorkarna hlan tura ngen tur kan ni lo. Congress Party chuan Rorelna dik leh tha din, Education Reforms, Health Sector Reforms, NLUP Changtlung zawk, Administrative Reforms hrang hrang hnuaiah mipui ten thuneihna leh mawhphurhna tam zawk an neih theihna tur te kan inhmakhawsuih mek a ni, a ti.
MPCC Senior Vice President chuan, India rama State pakhat kan nih vena zar kan zo nasa hle a, hmasawna hna thawhna tur pawh sum thahnem tak kum tin kan dawng a. Kum 2026-27 atana kan budget estimates Rs 17,496.91 crores hi kum sawm kalta kum 2016-17 a kan budget estimates Rs 8038.39 crores aiin Rs 9458 croes chuangin a sang zawk a. Kum 2026-27 a kan budget ah hian kan State in chhiah leh a dang atanga kan thawh chhuah ve tur chu Rs 2759.75 crores niin kan budget atanga 16% tling lo hret a ni. A dang zawng hi chu Central sorkar chhiah tling khawm atanga Finance Commission-in kan chan ve tura a ruat leh Central sorkar atanga tanpuina leh Centrally Sponsored Scheme atang tea kan dawn turte an ni, a ti.
Nikum 2025 khan Central Sorkar chhiah tling khawm atanga sum kan dawn hi mi pakhat zelah Rs 56,000 anga chhut a ni. Tin, Mizoramin Central Sorkara direct tax / chhiah kan chhun luh Rs 100 zelah Rs 3583 hmu let ang kan ni a. Hlawk tak kan ni.
Hetiang dinhmun thaah hian kan ding reng thei ang em? tih hi zawhna pawimawh tak a ni a. Mipui sum heti zozai kan dawnte hi a hmanna tur hmunah kan hmang em? tih leh a hman dan tur dik takin kan hmang em? tih hi mipuiten rorelna fawng chelhtute kan zawt a. Kan Chief Minister leh Ministerte hi kan aiawha kan sum vawngtu leh enkawltute mai an ni a. An kuta kan dah mipui sumte hi an ta a ni lova, danin a phut anga dik leh fel takin an hmang tur a ni. An mimal hlawkna tur leh an duhsak zawngte hlawkna tur uma an hman a thiang lo MPCC Senior VP chuan a ti bawk.
MPCC Senior Vice President chuan, MNF Sorkar kha mipui sum enkawl kawngah mipuite mit an tlung lova. Chuvangin kum 2023 inthlanpui-ah mipui ten an hnawl a. Mipui sum dik leh fel taka enkawl leh hmang tura nasa taka intiamtu ZPM chu rarelna fawng chelh tua thlan tlin an ni. Amaherawh chu ZPM sorkar hi mipuite laka an intiamna ti hlawhtling loin, nasa taka an sawisel MNF sorkar thil tih tha lo te chu an rawn ti ve ta vek a. A chang tur hresa-a tender chhuah te, Restricted Tender lem te chu MNF sorkar aia nasain an rawn uar ta zawk a. MNF sorkar lai pawha kan hriat lar em em loh Departmental Work lem te, Work Supervisor lem hmanga dik lo taka duhsak zawngte hnena contract hna pek te pawh a lar ta hle a. Hetiang hmanga hna an thawh mek Ramrikawn to NH 54 via Sakawrtuichhun kawng siam chungchang pawh Mizoram Lokayukta in a chhui mek tih te pawh a ri ta reng a ni, a ti bawk.
Hlemhletna kawngah na taka tlan tumin an inhmakhua nasa tih hi ZPM sorkar tirh phat atanga kan au chhuahpui a ni a. CBI hnena general consent pek chungchang te, Mizoram Lokayukta Act ti danglam a, a pawimawhna an tih hniam chungchang te pawh July 2024 ah press conference kan neihpui tawh a, CM hnenah pawh lehkha kan pe tawh a. Restricted tender zawng zawng phalna petu nih te, Contract hna lian chin zawng zawng approve tu nih te hi sorkar hotu lu ber office atanga tih tum tlat hian thil tha aiin thil tha lo a hring zel dawnin a lang, a ti a. A pawimawh ber leh kan rilrua kan lo ngaihtuah theuh atana tul chu Mipui ten kan chanvo tur kan chang vek em tih te hi a ni, a ti bawk.
