MPSC hna laka thil diklo thlengte chhuichhuak a, mawhphurtu chung-a dan anga action lak ni rawh se. Lalremruata Chhangte MNF GS
Vawiin June ni 12, 2026 (Zirtawpni) khan Mizo Hnam Runah chhung inkhawm neih a ni a, MNF General Secretary Lalremruata Chhangte chuan thu sawiin, tun hnai kum 1 leh a chanve chhunga Mizoram Public Service Commission (MPSC) in hna lak a buatsaihah thil dik tawk lo a thleng tam hle a. Thil fel lo awmte rang taka chhui chhuaka mawhphurtu chungah dan anga action la turin Mizoram sorkar a phut tih a sawi.
Lalremruata Chhangte chuan, “MPSC hian Mizoram chhunga sorkar hna sang lak (direct recruitment) bakah a ken tel exam hrang hrang an khawih avangin thawktute an hahin an ṭul hle ang tih a rin thiam theih a. Chuvang chuan, a chhawk zangkhaina tura rintlak MNF sorkar khan Group 'B’ (Non- Gazetted) leh a hnuai lam hna lak leh promotion/ departmental exam hrang hrang buaipui turin Mizoram Sub-Ordinate Service Selection Board (MSSSB) February ni 28, 2020 khan a din a, MPSC tih tur ṭhahnem tak tiin a pui nasa hle; MSSSB hna lak kalphung kha sawisel tur avang a, hna dil ṭhin Mizo ṭhalaite pawhin an fak a, hamṭhatna hmu pawh an ṭhahnem hle a, MSSSB 2020-‘21 leh 2021- ‘22 an annual report hmuh theihah hna lak (direct recruitment) 117 a nei hman a, mi 1618 promotion tur a siam hman bawk a, departmental exam 189 a buatsaih a, MR atanga contract a tih ngheh 38 a nei a, temporary service mi 993-te a tichiang (confirm) hman bawk a, hna tih nghehna (regularisation) post 52 a siam hman bawk a ni,” a ti.
MNF General Secretary chuan, “ZPM hian an sorkar tukah Mizo ṭhalai hna zawng mekte tana din, MSSSB a ṭhiah nghal avangin MPSC kutah hna lak kaihhnawih engkim a awm leh nghal vek a, MPSC tichangtlung tura Chief Minister Lalduhoma intiamnaah engemaw chen hmalakna awm mahse, tunlaia MPSC hnalak dan dinhmun thlirin hmasawnna a tam lemlo hle a, February 2, 2026 a MCS Combined Exam (2025) result chhuak-ah tling tawh pakhat chu hnawl leh a ni a; May 13, 2026 a Junior Grade (MES) Combined Exam (2025) result tih chhuahah Electrical & Electronics Engineering Wing-ah MES pasarih lak turah pariat tih tlin niin, pakhat an paih tla leh bawk a, hei hi top officer tura hna lakna anih avangin thil diklo lian tham tak a ni,” a ti.
Lalremruata Chhangte chuan, “Sorkar hnalakah Mizoram sorkar pawh a ṭang a, MPSC hian exam chi hrang hrang a nei deuh reng a, a lawmawm hle. Hna lak kaihhnawih engemaw chen lo chhawk zangkhaitu MSSSB awm ta si lovah pressure sang tak an hmachhawn tih a hriat a. Thil fel tawk lo langsar tak tak, tun hmaa la thleng ngai lo exam buatsaihah a thleng zut reng a, hun lokal zel turah zirlai leh ṭhalai hna zawng mek, rilru thianghlim tak pute’n MPSC rinna an hloh mai ang tih a hlauhawm ta hle a ni, India Dan pui hnuaia din ngat MPSC zahawmna tih bawrhban leh rintawklohna thleng mek hi en liam mai chi a ni lova. A chhan hriat chhuah vat a hun tawh a; hrem ngai an awm anih pawhin mawhphurtu chungah dan anga action la turin Mizoram sorkar ka phut takzet a ni”, a ti bawk.
