Mizo Zirlai Pawl(MZP) chuan Mizoram rawn tlawhtu(Tourist) hrang hrang lo pung chho mekah, khualpang zin leh thildanga Mizoram rawn tlawhtute hian thil an hriat ngai leh an fimkhurna tur awm niin an hria a. Mizo nunzia leh khawsakphung te an ngaihpawimawh leh zah an beiseiin a phut tlat a ni, an ti.
MZP chuan, thuchhuah siamin, hnamdang (Tourist) Mizoram rawn tlawhte'n a social media leh thil dang danga thehdarh tur digital content an siamte hian Mizo hnam, sakhua leh khawtlang timualpho thei tur chu siam lo turin a chah a. Mimal in leh biakinahte video emaw thlalak pangngai emaw pawh ni se, phalna nei lo chuan pawng lak mai mai lo tur leh Tourist Mizoram la rawn tlawh leh zel tur te pawhin, Mizo min hmuh dan a dik lo zawnga a hruai theihna tur thilah phei chuan fimkhur hle turin an hriattir a ni.
MZP chuan, mipui nawlpui awm dan leh nunphung pangai aia uchuakin khawiah pawh awm lo turin an ngen a. A bikin sakhaw hmun leh biakinte hi zah a, Mizo hnam leh nunzia te zahin, Mizo mipuite mit ti kham lo zawnga awm turin khualzinte an chah tih an sawi bawk.
MZP chuan, Hmeichhia leh hmeichhe naupangte hi an thla emaw video emaw la a, mi ngaihdan hruai kawi thei tur zawnga pholan te hi MZP chuan a duh lo a. Khawlai ilo a hmuh remchan apiang kawm a, Mizo chanchin a hluhlang zawng leh kimchang lo thehdarh zui pawh a rem ti lo a ni, an ti bawk.
