Mizoram-ah a hmasa ber atan Territorial Army (Home & Hearth)-a ṭang turte lakna chu November ni 15, 2025 leh November ni 25, 2025 inkar hian Rajiv Gandhi Stadium, Aizawl-ah neih a ni dawn a. He hna lakna hi Mizoram Sorkar leh 166 INF BN (TA) (H&H) Assam-te ṭangkawp chuan an buaipui dawn a, a vawikhatna atan hmeichhia-te tan Territorial Army (Home & Hearth)-a an luh theihna tur a ni.
Territorial Army (Home & Hearth) hian ṭhalai zamṭha tak tak te, Indian Army uniform ha chunga an hmalam hun atana an inbuatsaih zel theihna tår hun remchang a siamsak a. Territorial Army atana lakte chuan Indian Army uniform nen chhuanawm taka ram tana hnathawkin, India Army te angin hlawh leh hamṭhatna bakah damdawia inenkawlna te an dawng a. An hnathawh ṭhat dan leh mawmawh dana zirin Territorial Army te hi hun rei zawk atana chhawr theih leh hamṭhatna hrang hrang Sorkar ruahman anga pekzui zel tur an ni.
Lt. Col. (Retd) Clement Lalhmingthanga, MLA, Chairman, State Level Committee on Territorial Army Coordination and Establishment chuan kan ṭhalai te kutah Mizoram hmasawnna tur meichher chu awmin chu chuan India Hmarchhak Mizoram dinhmun tisangtu tur a nih thu a sawi a. Chumi atan chuan Territorial Army-a kan luh theihna huntha hi bawhpelh lo a, kan ram tana hna thawh theihna hna zahawm hi ngaihven turin Mizo thalaite a ngen.
Territorial Army Mizoram-a dinna pawimawhzia hriain Empowered State Level Committee on Territorial Army Coordination and Establishment chuan Mizoram pum huapin awareness campaign neiin, he awareness campaign hi ni 27 October 2025-a kalpui tura hmalak a ni a. (Thawhṭanni) aṭang hian DIPR, Doordarshan Aizawl, All India Radio, District Territorial Army chungchanga hmalakna leh Information Offices te chuan ruahmanna-te puanzar hna chu social leh digital media kaltlangin an thawk ṭan dawn a. Mizo ṭhalai, hmeichhia leh mipa Territorial Army dil thei zawng zawng te fuih a, ram tana hna ṭha leh zahawm tak hi dil a, chumi atana tling ngei tura inbuatsaih a, Territorial Army-a an luh ngei theihna tura atan awareness campaign hi kalpui a ni dawn a ni.
