Phalna nei lova Mizoram-a lo lut ramdangmi 2 thawn kir an ni.
Tun hnai khan March 24. 2026 (Thawhlehni) kalta khan Slovak hnam kum 58 a upa Rodan Ivan chu, Myanmar rama luh a tum mek laiin Siaha District-a Laki khua-ah Assam Rifles ten an man a. Ramdangmi Mizoram-a lut turte tana neih ngei ngei ngai Protected Area Permit (PAP) nei lova lo lut a nih avang leh Myanmar a luh tum a nih avangin, Siaha district police kutah an hlan a. Police leh intelligence ten thu an zawh a chhan dan chuan, Slovak pa hian Thailand a khawsa leh khawvel hmun hrang hranga zin kual a nih thu a sawi a. Tun tumah hian Myanmar ram mi a thianpa-in an kut pakhat chhim tura a sawm avanga, Mizoram kaltlanga Myanmar luh tum a nih thu a sawi a. Central sorkar thuneitute nena an inrawn hnu-ah, Zirtawpni khan Lengpui atangin Kolkata panin Mizoram a chhuahsan ta a ni.
March Ni 25. 2026 (Nilaini) khan Russian mi Igor Babko kum 41 a upa chu, Tripura atangin Mamit district-a Rajiv Nagar khua-ah thirsakawra chuangin a lo lut bawk a. A ni pawh hian PAP a neih loh avangin BSF ten lo manin, Mamit district police kutah an hlan a. Mamit Police-te chuan Aizawl-ah rawn thawh chhovin, central sorkar thuneitute nena an inrawn hnu-ah nimin khan a thirsakawr vek hmangin Assam lamah an thawn leh a ni. Igor Babko hi May ni 4-a Delhi atanga Tokyo a thlawk chho tura thlawhna ticket nei lawk a nih thu Mizoram police atanga thudawn a ni a. Police hotu pakhat chuan online hmanga PAP dilna hi Ministry of Home Affairs thuneitute'n an pek chhuah tlai thin avangin an hmanhmawhin Mizoram a central sorkar hnuai a thawkte hriatthiamna-in phalna an dilna pawmsaka lo lut mai an awm thin thu an sawi a. Hei hi central sorkar lam vuaicha vang a nih thu an sawi a ni.
He tih lai hian Union Home Minister Amit Shah chuan National Investigation Agency (NIA)-te’n tun hnaia an man Ukraine leh US mite chu India ram himna tichhe zawnga che ni lovin Mizoram kaltlanga Myanmar a luh tum mai an ni a ti. ( Thu lakna thenkhat hi AIR News a ni e)
