Ram chhung hmun dangte rualin Mizoram-ah pawh Fire Service Week 2026 hman a ni.
Kum tinin Fire Service Week hi India ram pumah 14th – 20th April chhungin hman thin niin, 14th April bik hi Fire Service Day/Martyrs Day atan hman a ni thin bawk a. Mizoramah chuan tukin khan HL Thangzuala Director, Fire & Emergency Services Department chuan Fire Service Week, 2026 hi State puma hman turin a hawng a ni.
Kumin Fire Service Week/Hapta, hawnnaah hian Fire & Emergency Services Department Director, HL Thangzuala chuan thu sawiin India ram puma Fire Service Week hmanin a tum bulpui ber chu mipui vantlang leh mimal tin te, kan nitin nun, khawsak leh chet velna tinrengah kangmei tichhuaklo tura invenna leh fimkhurna chang kan lo hriat deuh deuhna tura inzirtir a nih thu a sawi a. Kumin Fire Service Week thupui sawizauvin, kangmei lakah sikul leh damdawi inte a lo him zawk nan khawtlang mipuite kangmei tichhuak lo tura infuihna a nih thu a tarlang a. Fire Service Day 2026 pualin Department a thawk zawng zawngte chu mahni zawn theuhah inpekna thar nen, tha leh zual a hna thawk theuh tura sawmin, mipuite rawngbawltu an ni tih inhre thar theuh turin a chah nghal bawk a ni.
Mizoramah chuan kumin Fire Service Week pual hian damdawi in thlan bikahte Fire Safety Audit neih a ni dawn a. Tin, School hrang hrangah School naupangte Fire & Evacuation Drill leh Lecture & Demonstration neih pui an ni dawn bawk a ni.
Kumin Fire Service week denchhen hian Mizoram atangin F&ES a thawk mi 5 (panga) te chu Director General-Fire Service, Civil Defence & Home Guard, MHA, Govt. of India chuan an hnathawh that avangin Silver & Bronze Disc and Commendation Certificate dawng turin a rawn thlang a, chungte chu:
Silver Disc
1. Pu Lalremmawia Divisional Fire Officer, F&ES.
Brone Disc
1. Firefighter R.Laltanliana Serchhip Fire Station
2. Firefighter H. Lalremruata Mamit Fire Station
3. Driver Grade – II Ramsangzela Mamit Fire Station
4. Driver Grade – II FX Laltanpuia Serchhip Fire Station-te an ni.
Kum 1944, April ni 14 khan Indo lawng lian tak ‘S.S Fort Stikine’ an tih chu Mumbai lawng chawlh hmun a lo thleng a. He lawng, ralthuam leh bomb lam chi tam tak phur hi a kang ta vak mai a. He kangmei chhuak rapthlak takah hian Bombay Fire Brigade mi 66 leh Bombay Salvage Corps mi 11 kangthelh tute chuan an nunna an chan phah a. Heng mitthi te hriatrengna atan hian Fire Service Day hi April 14 ah hian hman a ni ta a. Hemi ni denchhen hian April 14th - 20th chhung hi Fire Service Week atan hman a ni thin a ni. He week chhung hian India rama Fire Service chi hrang hrang te chuan hmun hrang hrangah kangmei laka himna tur zirtirna an nei thin a. Kumin 2026 Fire Service Week thupui atan hian India Sawrkar chuan "Safe School, Safe Hospital & Fire Aware Society – Together for Fire Prevention" tih a thlang a ni.
Martyrs Day/Comemmoration Day Parade hi Aizawl ah chuan Fire & Emergency Services Headquarters, Hunthar Vengah ni 14th April 2026 zing dar 7:00 a.m. khan hman a ni a. Aizawl pawn lama Fire Station te chuan ni 14th April 2026 zing dar 9:00 a.m ah an mahni hmun theuh ah an hmang ve bawk a ni.
