Ministry of Skill Development & Entreprenuership buatsaih, India Skills Northeast Regional Competition 2025-26, Guwahati University-a neih zawh takah Mizoram team chuan Gold medal 9, Silver medal 3, Bronze medal 3 leh Medallion for Excellence 6 lain hmar chhak state-ah an champion.
Regional Skill Competition hi 19th -22nd January,2026 ah Guwahati University-a neih a ni a, Trade hrang hrang inelna 26- awmin, Mizoram Team-te hian trade 20 ah inelna hmachhawnin hlawhtlinna ropui tak an rawn thlen a ni.
He Regional Skill Competition hi hmarchhak state hrang hrangte thiamna leh kutchhuak fiahna hmunpui a ni a. Mizoram team-te hlawhtlinna hian Mizoram thalaite kutchhuak leh thiamna chu hmarchhak state-ah chauh ni lo, ram pum huap pawhin a sang hle tih a nemnghet a ni.
Mizoram aiawhtute hi LESDE Department-in December 8 - 12, 2025 chhunga Mizoram Skills Competition a buatsaih kaltlanga thlan an ni. Northeast Regional Skills Competition-a winner, Gold leh Silver la te hian India Skills Competition, National Level-ah Northeast Region ai an awh anga, an tih ṭhat dan a zirin ‘World Skills Competition’ leh ‘Asian Skill competition’-ah India ai an awh ang.
Mizoram team hian - Electronics, Fashion technology, Floristry, Hairdressing, Hotel reception, Painting and decorating, Restaurant service, Retail sales leh Visual merchandising ah Gold medal; Floristry, Mobile application leh Software category ah Silver medal; Bakery, Restaurant service leh software ah te bronze medal lain, ‘Medalion for Excellence’ hi Cooking, Beauty therapy , Electronics , Graphics designing, Painting leh Hairdressing ah an la a ni.
