Sorkarin ruang phurhna tur a ruahman chu awlsam zawka a mamawh ten an chhawr tangkai theih nan internet kaltlanga dawrna tur Ruang Phurh Online Portal nimin ni 15.1.2026 khan Social Welfare Minister Pi Lalrinpuiin a hawng.
Ruang phurh online portal hi google play leh app store atanga download theih niin, nimin ni thlenga ruangphurhna application lut tawh zat hi 1680 a ni a, cheng nuai 175 sing 8 sang 5 pek chhuah tawh a ni.
Ruang phurhna senso sorkarin a tumsakna hi kum 2024 September thla khan hawn a ni a, hemi kum vek December thla atangin ruang phurh man hi pek tan a ni. Mizoram sorkar chuan ruang phurhna senso tur hi kum 2024-25 leh 2025-26 atan budget-ah cheng nuai 500 ve ve a dah a; ruang phurh inkaihhruaina in a tarlan danin, ruang phurh tur chu a thlenna tur km. 20 aia hnai a ni tur a ni lo a, km. 20 piah lamah chuan tu tan pawh hman theih niin, lirthei thlen theih chin a huam a ni.
Inkaihhruaina ang chuan, ruang phurhna lirthei hman man chu State Transport Authority in rate a siam anga kalpui a ni a, ruang phurhna man sorkarin a peksak hian lirthei pakhat chiah a huam a, Ruang phurhna hlat zawng chhût nan ruang chhuahna aṭanga a dahna hmun inkar hlat zawng lâk tur a ni a; lirthei thlen lohna khua a nih chuan lirthei thlen theih tàwpna thleng a ni. Ruang phurhna chu kawng tawi thei ber hman tur a ni bawk.
