Vawiin khan Health&Family Welfare Department Minister Pi Lalrinpuii chuan Directorate of Health & Medical Education Auditorium, MINECO-ah 12th Mizoram State Anti-Tobacco Day 2025 puala, ‘zuk leh hmuam tel lo nundan changkang’ tih thupui hmanga buatsaih Tobacco-free Youth Campaign 3.0 chu a hawng.
Hawnna inkhawmah hian Health Minister chuan thusawiin, TFYC-in a tum ber chu Mizorama khuate leh zirna ina tam thei ang ber vaihlo leh a kaihhnawih awm lohna hmuna siam tura hmalak a ni tih a sawi a. Department zirchiannain a tarlan danin, ruihhlo ngawlvei tam ber chu zuk leh hmuam atanga bul tan an niin, Middle School naupangte zingah pawh zuk leh hmuam leh damdawi tite hial pawh an awm tih thu a sawi.
Zuk leh hmuam tih chuan rilru leh taksa hriselna a nghawng mai bakah kan chheh vel boruak leh mimal leh chhungkaw sum enkawldan thlengin, nitin nun a nghawng tak zet tih a sawi a. Health Minister chuan, Anti-Tobacco Day pualin vaihlo leh a kaihhnawih do kawngah chuan mahni zawn theuhva theihtawp chhuah zel turin kalkhawmte chu a chah bawk.
