State BJP President in Larsap a kawm. Fur laia inkal pawhna kawngpui a that theih nan inbuatsaih lawk a tul a hrilh
Vawiin tahrik 7, May, 2026 (Thursday) tlai Dar 3:30 pm khan, Mizoram Larsap chuan Dr. K. Beichhua, MLA & State President, BJP Mizoram chu leng a sawm in, Mizoram state hmasawnna tur thil hrang hrang an sawidun a, hmalak dan tur te pawh larsap hian a sawipui a. State President hi Delson Notlia, MDC & State General Secretary in a tawiawm ani.
BJP Thuchhuah tarlan danin, Dr K Beichhua, MLA State President chuan, Fur ruahtui lo thleng leh tur a tana inbuatsaih that a tul thu Larsap hnen ah hian sawiin, Mizoram inkal pawhna kawngpui te, fur laia tha taka kal a nih theih nana hma lak a ngaih thu leh tun a tanga inbuatsaih lawk a tul thu sawiin, Mipui ten Furpui lo thleng tur avanga harsatna lian tham an tawh loh nan leh lei min theih na hmun, mihring tana hlauhawm thei te enfel a tul thu a hrilh a sawipui a ni.
Hei bakah Ayushman Bharat Pradhan Mantri Jan Arogya Yojana (AB PM-JAY) PM Health Care Scheme kan tih chungchang-ah Golden Card nei thei si, awareness that tawk loh vanga mirethei tam tak Golden Card nei lo an la awm thu te, Senior Citizen, Kum 70 chin chunglam puala PM Modia'n Golden Card a thlawn a siam theih chungchang te pawh tun aia uar a mipui hrilh hriat a pawimawh thu te a sawipui bawk a ni.
Larsap hian Dr. K. Beichhua thuthlen te chu pawimawh a tih thu leh a hlawhtlin theih nan a theih tawp chhuah a lo en pui a tum thu a hrilh a ni.
