Vawiin Ni 3, February, 2026(Thawhlehni) Chawhnu khan Dawrpui Multipurpose Hall-ah, Mizoram State Day puala, State Day of Prayer hman tur inpuahchahna kal mekte, State Day of Prayer Organising Committee-te leh Sub-Committee hrang hrangte’n thlir hona an nei a. Working Chairman Pu F Rodingliana’n a kai hruai.
Sub-Committee hrang hrang atangin inpuahchahna report ngaihthlak a ni a, hmalakna tur la awmte sawiho nghal niin, tawngtairualna hun hman a ni bawk a. Zaipawl Pui leh Praise Team kalpui dan tur pawh sawiho a ni bawk.
State Day of Prayer hi State Day of Prayer Committee kaihhruaina hnuaia kalpui niin, a tul dan a zirin Sorkar nen thawk dunin nikum 2025 pawh khan Sorkar-in a hrana State Day of Prayer official programme nei loin, Chief Minister Pu Lalduhoma leh a thawhpui ram roreltute nen kokim takin AR lammual-ah “I ram lo thleng rawh se’ tih thupui hmangin tawngtaina hun tha tak hman a ni a, Zoram chhung hmun za chuang ah leh Zoram pawn hmun engemaw zatah hman a ni bawk.
Kumin 2026 thupui atan “I dinthar leh ang u” (Nehemia 2:17) chu thlan a ni a, kumin hi Zoramah harhna a thlen kum 120-na a nih angin State Day of Prayer chuan Ni 18-20 February, 2026 inkar hi ram tana chawnghei tawngtaina neih turin a ruahman a, he hun hi zofate hmun hrang hranga awmte mahni awm hmunah a theih ang anga hmanpui turin Committee chuan a sawm bawk a ni.
