Nimin tlai khan Food, Civil Supplies and Consumer Affairs Minister B. Lalchhanzova pisa-ah North East Gas Grid (N.E.G.G) hnuaia Tripura atanga Mizorama Gas Pipeline phum mek Progress Report ngaihthlakna hun leh Review Meeting neih a ni.
He Gas Pipeline hi Panisagar, Tripura atanga Sihhmui, Mizoram thlenga phum tur a ni a, Tripura huam chhungah hian 15 kms phum tur niin, Mizoram chhungah 104kms phum tur a duan a ni bawk a. Tunah hian 28 kms vel phum fel tawh niin, he hna hi tha taka zawh a nih theih nan leh a rang lama zawh a nih theih nan Mizoram Sawrkar chuan a theihtawp a chhuah a, chutiang bawkin Indradhanush Gas Grid Limited (IGGL) lam pawhin a rang thei ang bera zawh a nih theih nan hma a la reng bawk a ni.
Progress Report en ho naah hian Minister chuan IGGL hnena Weekly Report pe tura a dil anga kar tin Report an pek thin avang chuan lawmthu a sawi a. Amaherawhchu gas pipeline phum hna hi a duh anga an thawh chak tawk loh thu sawiin hei aia chak a hna hi thawh a nih theih nan an hotute lam pawh a dawr dawn tih a sawi a ni.
He Meeting-ah hian FCS&CA hotute pawhin he Gas Pipeline phum hna hi tun aia chak zawk leh rintlak lehzuala hma lak a nih theih nan a hmun a enpui turin ro an rel a. Meeting ah hian Food Civil Supplies and Consumer Affairs Officials te mai bakah Indradhanush Gas Grid Limited (IGGL) Officials te an tel a ni.
