Tripura atanga Domestic gas pipeline chak taka phum mek a ni.CM
Vawiin khan Mizofed Petrol Pump, MINECO-ah Indian Oil Company Limited ten kum tina an kalpui thin hapta hnih chhung Oil leh gas renchem inzirtirna Saksham 2025-2026 chu Chief Minister Lalduhoma'n a hawng a. B. Lalchhanzova, Minister, FCS & CA Department-in a telpui. Kumin Shaksham thupui hi "Conserve Oil, Go Green" a ni.
Chief Minister chuan, oil leh gas te hi India ramin kan la intodelh lova, kan mamawh zaa sawmriat vel kan lalut thin a. Khawvela hmang tam ram pathumna kan ni a.
Oil leh gas kan hman tam hian boruak chhia, carbon dioxide leh sulphur dioxide te kan siamchhuak a, chu chu mihring hriselna tichhe thei a ni a. Tin, kan thing leh mau leh sik leh saten ten an chhiatpui a. Kan renchem hian sum leh pai kan ren tihna a ni a, kan ramngawte kan duat tihna a ni bawk a ni. Oil leh gas hi insiamthar leh zung zung chi an ni lova, kan tu leh faten an rawn mamawh ve zel dawn bawk si a. Vawiina kan renchem hian kan tu leh fate tan kan lo dahtha tihna a ni tel a ni, a ti a. Nitin mamawh pawimawh tak an nih bawk si avangin renchem taka kan hman thiam a tul hle a ni, a ti.
Oil leh Gas lama Mizoram hmasawnna tura hmalakna thenkhat tarlangin Chief Minister chuan, Domestic gas hi Aizawlah pipeline connection a awm theih nan hma lak mek a ni a. Tripura atangin a pipe hi chak taka phum mek a ni. Mizoram lei hnuaia oil leh gas zawn hna hi chak zawka kalpui a nih theih nan kan bawhzui zel a. Green Energy lamah pawh hmasawn theihna remchang kan neihte chak takin kan thawk mek a ni, a ti bawk.
Supply Minister B. Lalchhanzova pawhin thusawiin, nitin gas supply lamah harsatna kan tawh loh nan kan tang hle a. Mualkhang Gas Bottling Plant kan tuai thar mek a, hna an thawk mek a. Oil supply chatlak vanga harsatna kan tawh thinte tih ziaawm nan Oil Depot neih tumin kan bei mek bawk, a ti a. Oil leh gas hi nitina kan mamawh an nih avangin a semchhuaktute hian mipuite rawngbawlna hna pawimawh tak in thawk a, mipuiten harsatna an tawh loh nan thahnem ngai taka thawk zel turin kan beisei che u a ni, a ti.
Petroleum Planning & Analysis Cell, India chhinchhiah danin kum 2024-25 chhungin Mizoram hian Diesel (HSD) hi 119.20 Thousand Metric Ton, Petrol hi 58.83 Thousand Metric Ton leh LPG 34.6 Thousand Metric Ton kan hmang ral a. LPG distributor hi 60 an awm mek a, Petrol Pump (retail outlet) hi 115 a awm a, EV Charging Station hi a la awm lo thung a. Lirthei hi VAHAN atanga a lan danin Mizoram-ah 4,22,661 vel register tawh a ni.
Saksham hawnna inkhawm hi Z. Lhungdhim, DGM, LPG (E), State Level Coordinator chuan a kaihruai a. Saksham hman chhung hian kawng hrang hrangin oil leh gas rencham tura inzirtirna kalpui zui tur a ni.
