Lungleiah Flying Squad te'n tuialhthei leh eirawng bawlna gas zawrhna hmunte an endik
Lunglei, 2026 Ṭau thla ni 7: Lunglei District-a tuialhthei (Petroleum, Oil & Lubricants – POL) leh eirawng bawlna gas (Liquefied Petroleum Gas – LPG)-a harsatna a awm loh nana District Bawrhsap Navneet Mann kaihhruaina hnuaia hma lakna kal zelah Flying Squad chuan Lunglei khawpui chhunga tuialhthei zawrhna (filling station) leh gas agency te a hmunah kal chilhin an endik.
Flying Squad hi an Leader, Sub-Deputy Commissioner H. Lalthlengliana'n hovin, member-te – SDPO R. Lalthankima, Supply Inspector Andrew Lalramṭana, Legal Metrology Inspector Kawldingliana Colney leh DO (DM&R) Chuaupari Pachuau te an thawk chhuak a. Jedaz Filling Station (Zotlang), K. Sianglinga Filling Station (Zohnuai), MIZOFED Filling Station (AOC), El Pee Gas Agency leh Southern Gas Service te tlawhin, tuialhthei leh gas chhek khawl sa dinhmun te, mipuite tana an pek chhuah dan te an endik a. POL leh LPG chhek khawl sa (stock) chu a ṭhahnem thawkhatin, a lo thlenna lamah pawh harsatna a awm lo tih hmuh a ni a. Mipuite hnenah tluang taka sem chhuah niin, chhek khawl sa bak pawh a lo thlen belh zel beisei a ni.
Lunglei District-a POL leh LPG hnianghnar dan dinhmun leh a kaihhnawih harsatna hrang hrang vil turin Joint Control Room siam niin, Flying Squad din a ni bawk a. Anni hian POL leh LPG dinhmun chu ni tin an thlithlai reng a. District thuneitute chuan POL, LPG leh ni tin mamawh bungruate chheprelh lo tur te, a mantova zuar lo tur leh mipui tichi-ai thei zawnga thu dik lo theh darh lo tur te'n sumdawngte leh mipuite an ngen a. Hemi kaihhnawiha harsatna leh mamawh thlen duh nei chuan phone number 9862653478-ah hian Lunglei JCR/DEOC chu biak pawh theih reng a ni.
