16.1.2026 A bial khaw hrang hrang fang mek Dr. R. Lalthangliana MLA chuan, Zirtirtu 150 chuang Mamit District atanga hlawh la si, khawpui lama thawk daih an awm niin a sawi.
Dampa bialtu MLA chuan Dampa bial chhunga school leh health sub-centre hrang hrangte a tlawh nghal a, Dampa bial chhung sikul atanga hlawh la reng si, anmahni Aizawl lama thawk daihte pawh an awm thu sawiin, "Mamit District chhung atang hian zirtitu 150 chuang zet Mamit District School atanga hlawh la, khawpui lama anmahni thawk daih si an awm thu min hrilh," a ti.
Hei hi thil thalo tak, siamthat thuai ngai a tih thu a sawi a. Dampa bial chhungah sorkar sikul building nei mumal lo te, an luah laite pawh chhe tak tak, repair ngai a tam hle tih a hmun ngeia a hmuh thu a sawi a. Silsuri-ah pawh zirlai naupang 160 awmnaah, zirtirtu nghetlo pahnih chauh an thawk a, sikul building luah tur an nei mumal hek lo. Hengte hi hmalak thuai anih theih nan bialtu MLA ka nih angin sorkarah ka thlen ang, a ti bawk.
