A kum telin kan leiba vaibelchhe telin a pung awk2. Er. Rohminga MLA
March ni 20, 2026; Zirtawpni khan Mizo Hnam Runah chhung inkhawm neih a ni a. Er R. Rohmingliana MLA, MNF Legislature Party Secretary chuan session report tlangpui a pe.
Er. Rohminga chuan, Mizoram Universal Health Care Scheme (MUHCS) hi MNF sorkar hunlaia duan kha a ni a, September ni 26, 2023 khan notification tihchhuah a lo ni tawh a. Mizoram Universal Health Coverage Scheme (MUHCS) tia vuahin, April ni 1, 2024 aṭanga hman ṭan tura tih a ni, a ti a. Hetah hian cashless a nih tur thu te, nuai 5 thleng chhungkaw khatin bill theih a nih tur thu te, sorkar hnathawkten an thawh ve turte thlenga tarlan a ni a. Thailand-a Health Minister hova an han zir pawh khan thil thar an han hmuchhuak vak lo a nih hmel a, MNF duan ang diak diak deuh thawin an hmang a ni," a ti.
Er. Rohminga chuan, "Lengpui ram hralh chungchanga CBI concent an pekna lehkha hi a complain-tu hnenah a copy pek ve a ni lo a. Chu bakah a complain-tu Lalpianfela Chawngthu-in a complain-na no 12-naah Chief Minister leh Revenue Minister inrawlhna a tarlan chu CBI consent lehkhaah hian tarlan a ni lo bawk niin a sawi a. CBI consent an pekna hi hei aia chiangkuang zawk ni thei se a ṭha hle," a ti bawk.
MNF Legislature Party Secretary chuan, "Tun budget pharh tak kha budget ṭha lo tak a ni," a ti a. "Budget pumpui aṭanga a let leh tur awm lo chi, sorkar inrelbawlna (Revenue Expenditure) chu 82.52% a ni a. Tin, hmasawnna hnathawhna tur (Capital Expenditure) chu 17.45% chauh dah a ni a. He 17.45%-ah hian kan loan rulhna tur a la tel zui a. ZPM-in an sorkar hmaa an policy lehkhabu tihchhuahah kum 2022 leh 2023 MNF sorkar laia Revenue Expenditure 71.43% leh Capital Expenditure 28.57 chu ṭha lo an tih thu an tarlang a. Chuti a nih chuan tun budget hi ZPM party chuan ṭha lo an ti hle ang a ti.
Tin, inremchem tura insawi, CM leh Minister ten motor pakhat bak kawl lo tura insawi hian an bawhchhe vek a ni," a ti a. "Tun sorkarah a kum telin vaibelchhe telin kan leiba a pung awk awk mai bawk a ni," a ti bawk.
