Aizawl khawpui enkawl tur tal hi chu i ti fuh tawh ang u. Banakaih changlo leh CM Special Package dawng lo zawng zawng te pawh NLUP hmangin an ban kan kaih sak dawn. Lal Thanzara
Zirtawpni kalta khan MPCC President Lal Thanzara chuan Congress Bhavan-ah thu sawiin, “Kan hma lawkah AMC kan inthlang dawn a, State Election-ah kan tisual tawh a, AMC Election ah chuan tisual tawh lo turin Aizawl mipuite ka ngen che u a ni, a ti. ZPM sorkar hian an intiamna ang, kan ti ang an tih te an ti lo fai vek a, kan lo tisual hle a. State sorkar ah kan tifuh tawh lo va, Aizawl khawpui enkawl tur tal hi chu i ti fuh tawh ang u, a ti.
MPCC President chuan, “AMC Election ah hian milar te, infiammi te kan thlantlin in nge khawtlang, kohhran leh YMA a inhmang leh Local Council a tawnhriat nei tawh te Aizawl khawpui tan tha ang tih mipuite pawhin kan ngaihtuah a ngai a ni, a ti a. Khawtlang rorelna leh hmasawnna te, in leh lo ram harsatna te a awm changa thubuai rem leh rorel a, ngaihtuahna seng tur an ni a, hmel leh hmai tidanglam, milar leh infiammi te hian min ngaihtuah pui thei ang em tih kan ngiahtuah a ngai a. Keini Congress party chuan Candidate atan khawtlang, kohhran leh YMA a inhmang, Local council member ni tawh leh ni mek, tawnhriat nei candidate kan zawng a, candidate atan kan hmang a ni, a ti.
MPCC President chuan, “AMC hi Congress chhulchhuak a ni, a hringtu lo ten hun rei tak an kaihhruai avangin Aizawl khawpui hi a nawm tur angin a nuam lo a. A hringtu te ngeiin kan enkawl a ngai tawh a. Aizawl khawpui nuam leh hmasawnna kan rawn chhawpchhuak dawn a, chumi atan chuan intihsual tawh loh nan leh a tlai hnua in inchhir tawh loh nan kan candidate te lo vote turin ka ngen a che u a ni, a ti bawk.
“2028 MLA inthlan ah Congress kan tling a nih chuan Ration buhfai man leh Oil man hi kan ennawn dawn a, NLUP changtlung zawk kan kalpui leh dawn bawk a. Chumi hmang chuan mirethei te, khawpuia mirethei te, thalaite an dinhmun kan siamthatsak leh dawn a. Tuna Banakaih changlo leh Chief Minister Special Package dawng lo zawng zawng te pawh NLUP hmangin an ban kan kaih sak dawn a, NLUP ah chuan inthliarna a awm ve lovang, a ti bawk.
