Aizawl khawpui nuam leh changkang zawk siam zel kan tum. Nunui Rualhleng
Inrinni khan MNF AMC Candidate R. Lalnunthari (Nunui Rualhleng) chuan Aizawl Press Club-ah thuthar lakhawmtute kawmin, Aizawl Municipal Corporation (AMC) inthlan chu kan lo hnaih ta hle a. MNF Party chuan theih tawp chhuahin hnehna chan tumin thianghlim tak leh rim takin a thawk mek a ni, a ti.
Nunui Rualhleng chuan, MNF hian Aizawl hi hawisan kan tum lova, kan tum lo mai ni lovin, Aizawl hmasawn zawk, changkang zawk leh mipui mimir hrim hrim pawh dinhmun sang zawka hlankai tumin kan inruahman a ni, a ti a. AMC Election 2026-ah hian MNF Party-in Pathian leh mipuite zara sorkarna a siam chhunzawm leh a nih chuan, Aizawl khawpui enkawl tura hmalak a tum dan pawimawh zualte sawiin, chung zingah chuan, AMC inrelbawlna tha zawk leh chak zawk siam tum a ni ang tih te, Local Council leh Ward Committee-te mawhphurhna a lo mumal zawk theih nan ruahmanna siam a ni ang tih te, Kut tling leh belhchian dawla hna thawh tih te leh AMC sorkar chak zawk leh langtlang din chhunzawm tum a ni a, thawktu indaih loh vanga hna muang thin tih ziaawm a nih theih nan thawktu lak belh tum a ni ang tih te a tel.
Aizawl khawpui chhunga chengte, AMC Licensing Regulation 2012 ennawn te, Luikawr tha zawk (Drainage System) te, Veng hrang hranga CCTV tam zawk dah te, Aizawl khawpui cheimawi (Aizawl Beautification) te,Bawlhhlawh paih leh sawngbawl te, Aizawl khawpui 'Plastic Free City' a puan tawh hi a hlawhtlin zel theih nan chak leh felfai zawka hmalak chhunzawm te a tel a. Solid Waste Management: Bawlhhlawh (Solid Waste) paihna hmun siam belh tura hmalak a ni ang tih te. Ran vulh leh khuahkhirh chungchang te,
Sa leh Thlai thianghlim zawk zawrh a nih theih nana hmalak te a tel a. Aizawl veng hrang hranga Bazar hmun tam zawk leh changtlung zawk siam te leh Septic Tank khat tawh tih fai leh ek paihna (Disposal of Waste/Septage): Aizawl khawpuia Septic Tank khat tawh paih faina/ek paihna hmun siam belhin tuna kan neih mekte hi tih-changtlun te pawh a tel bawk.
