CM hian Finance Dept. hi a enkawl zo lo anih chuan, a enkawl theitu tur hnenah mawhphurhna hlan mai se a tha khawp ang, Dr. Thangtea
Vawiin April ni 6, 2026 (Thawhtanni) khan MNF Aizawl South I Block Executive Meeting leh AMC ward XVI & XVII Candidate-te inhmelhriattirna hun Aizawl Central Hall, Venghlui-ah neih a ni a. MNF Senior Vice President Dr.R.Lalthangliana, MLA chuan a hmanpui.
MNF Senior Vice President Dr. R. Lalthangliana MLA chuan, AMC chu MNF kutchhuak a ni a, mithiamte rawnin Aizawl khawpui hmasawn nan uluka kan din a ni, AMC enkawltu UD & PA department pawh MNF din a ni, a ti bawk.
Dr.R.Lalthangliana chuan, "Kan puk ve lo ang tituten an puk nasa ber a, kum 2023 December thla, ZPM an sorkar tirh atanga kumin February 2026 chhunga an sum puk zat chu cheng vbc 6445.45 a ni hem tawh a, SASCI loan ringawtah cheng vbc 2482.57 an puk tawh bawk," a ti.
Kum 2026-27 budget pumpui cheng vbc 17,076.92 anih laiin; kan leiba chu cheng vbc 19,085.15 a ni a, budget aia leiba a tam zawkna chu cheng vbc 2,008.23 lai a tling tawh thu a sawi bawk. Hetiang thil hi Assembly House-ah kum 36 vel a lo thut ve tawh chhungin a thlen a la hriat ngai loh thu a sawi bawk.
Dr.R.Lalthangliana chuan, "Tun hnaiah kan MLA Pu Robert Romawia Royte chuan ZPM sorkar tirh kum 2023-24 khan SASCI part-1 sum sanctioned fel sa thlap cheng nuai 11,152 leh sum allocate sa cheng nuai 32,800 a lo ti lapse a, a vaiin cheng nuai 43952 lai a lapse tih a hai chhuah kha kan hre vek ang a. Khati zat sum kan chan/hloh kha a uihawmin a pawi hle a, kan ram hmasawnna tura kawngro su tham tak lapse hi sawi pial mai mai chi a ni lo," a ti.
Sum an tih lapse zingah hian vawiina AMC ward XVI huam chhunga Bethlehem vengthlang hall sakna tur cheng vbc 9.50, Bethlehem Vengthlang High School sak thatna tur cheng vbc 2 leh College veng Hall extension-na tur cheng vbc 3.5 a tel ve nia a hriat thu a sawi. Chief Minister-in sum a enkawl thiam lohzia, 2nd installment tuartute zingah Aizawl South I in tel hi thil pawi tak a thleng ta a ni a ti.
Hengte avang chauh pawh hian Chief Minister Lalduhoma hian financial management a thiam lohzia a lang chiang hle a, Chief Minister financial management thiamlo tak kan nei mek a. Kan Chief Minister hian finance department hi a enkawl zo lo anih chuan a enkawl theitu tur hnenah mawhphurhna hlan mai se a tha khawp ang," MNF Senior Vice President chuan a ti bawk.
