CM-in a inhaivurna tur ni ngeia ngaih Ram Zau' tak a lei. MPYCC
Vawiin Ni 21.3.2026 (Inrinni) khan MPYCC chuan thuchhuah siamin, 2024 kum tira Buangpui ram chhung Vantawng khawhthla thlirna hmun leh a chhehvel Kanghmun South rama Chief Minister Pu Lalduhoma’n a Lal hrawtna dawhkan a luah hlimhlawta ram zau leh manto taka a lei nia sawi chu a hmunah MPYCC chuan an President Laltawnliana hovin an enfiah a. Kum 2021 Serchhip bial By Election-a rethei taka insawi khan Chief Minister a nih tuk atangin Mizoram mi hausa ber zingah a tel nghal tih a hmalakna hian a nemnghetah Congress Thalai chuan a ngai tih an sawi.
MPYCC chuan, Lalduhoma hian Vantawng khawhthla thlirna chhehvel buh tin 25-30 hmun vela zau, mi panga (5) ram chu Chief Minister a nih hlim chhawnah a tahtawlin (Plot) te tein a lei a. Kanghmun South lamah pawh mi 4 ta lei niin a then phei chu February thla tawp lamah vah chauh niin kar hnih pawh Chapchar a nih hmain hal a ni a, he a ram hi sorkar Department pakhat enkawl tir tura ruahman nia sawi a ni tih Congress Thalai chuan a hmunah a finfiah niin an sawi bawk.
Vantawng ram leh Saphak lui chhak lam Vantawng khawhthla thlirna remchang hmun tha lai zawng zawng hi Chief Minister hian Special Assistance to States for Capital Investment (SASCI) Scheme (Development of Iconic Tourist Centres to Global Scale) hmanga Vantawng khawhthla (Thenzawl) bula Rope-way siamna tura cheng vaibelchhe 34.50 hmanga hmalakna kalpui tur Compensation a dawn theihna hisap chung leh, Thenzawl Peace City-in a huam tur Kanghmun South rama mahni mimal inhaivura hmalakna a ni a, Chief Minister ni rei lo ber a ni chungin Chief Minister kan neih tawh zinga hausa chak berah Congress Thalai chuan a ngai a ni, an ti bawk.
Vantawng khawhthla leh a chheh vel hi he'ng lai ram neitu khuate hian Forest Department enkawlah ngaiin an pa pek reng thin a, tun hnai kum hnih velah khan mak tak maiin Lengpui Airport sir ram hralh tura hmanhmawh taka File kalpui a nih angin Party pakhat ruahmannain mi thenkhatin anmahni pualin hmanhmawh takin an insem a, an ram in pek/sem chu Chief Minister Pu Lalduhoma hian hmanhmawh takin a lei khawm sak ve thung a, a ram lei chin pawh hung tir niin hung zawh a la ni lo. Chulai ram leh a chhelvel chu hmun pawimawh tak a la nih dawn avangin hmanhmawh takin a panna kawng pawh zauh a ni a, ramngaw nuam leh Fâr thing din thupna hmun chu kih rem an ni vek tawh tih Congress Thalai chuan a hmunah a finfiah vek a ni, an ti bawk.
