Vawiin Zirtawpn-a Congress Party Political Session-ah Ex Minister, Adviser MPCC Pu Zodintluanga chuan thu sawiin, “Lengpui ram dik lo taka inleina chungchangah hian tuna kan sorkar lai Council of Ministers meeting in CBI chhui tura FIR an thehlut tur kha thil mak tak a ni a. Kan sorkar hian thil diklo a awm tih an pawm a, chhui tura state sorkar hnuaia mi ACB te hmang lova, CBI a thehluh an tum daih hi a mak hle a ni, a ti.
Zodintluanga chuan, sorkar kalta in engmah an ti lo tih an sawi thin a, tuna CM Bangla a an tui herh haw dur dur khi sorkar hmasa siam a ni a. Aizawl Greater Water Scheme te, Mamit te, Lunglei te, Lawngtlai te, Champhai te, thingtlang khaw tam takah tui thianghlim pek a ni te, Power supply te, Health Sub Center te pawh khaw tinah din a ni. Solar Water Pumping System te kha Congress sorkar tihchhuah a ni, a ti a. Thingtlang khaw tin motor kawng in a pawh a, school khaw tinah din a ni a, Sub Center te kan din a, chung chu ZPM awm hma a siam vek a ni a. Thalai infiammi te tan pawh District khawpui tinah statdium puitling kan din a, vawiin ah hian ZPM hian enge an tih ve tih ka zawt a. Sawhthing chiah an buaipui a, sawhthing hi an tlakpui dawn a ni, a ti bawk.
Zodintluanga chuan, “Kan CM hian an sorkar hma khan portfolio a nei ve dawn loh thu a sawi a, mahse a CM hnu chuan portfolio tha tha a chang leh si a. CM kan lo nei ve nual tawh a, Pu Lalduhoma aia corrupt hi an awm lo, a ti a. CM atana swearing in a neih hma hauhin a inhmun a lai nghal a, lian takin a sa mek a. Kan CM pakhat khan nui uar uar chungin dawt a sawi thin a, tunah hian CM awihawm taka dawtsawi thiam kan nei mek a ni.” a ti bawk.
