Kan CM ni mek hian, kum tam tak CM lo ni tawhte neih ang kum 2 chhungin a nei hman vek. Zodintluanga Ex-Minister
Vawiin April ni 9, 2026 (Ningani) khan Congress Mahila, General Headquaters chuan Tuma Resort ah Political Training an nei a, MPCC Advisor Zodintluanga chuan AMC-ah hian Congress hi Aizawl mipuite tan a sorkar ngei ngei a ngaih thu a sawi.
MPCC Adisor Pu Zodintluanga, Ex - Minister chuan thu sawiin AMC hi MNF ten kan din an ti a. AMC act chu an siam ve mai. Nimahsela, Municipal pian tir tumna tak tak a awmlo. Kum 2008-a Congress Sorkar alo pian khan Municipal din anih theih nan a rules duangin theihtawp kan chhuah a. AMC hi Congress kutchhuak liau liau a ni. Tun Municipal ah hian Congress hi Aizawl mipuite tan a sorkar ngei ngei a ngai a. Ram pumah ZPM an sorkar a, Buhfai man an ti to nghal a. Petrol man an ti sang nghal a, engkim a to phah a ni. AMC ah ZPM kan sorkar tir a nih chuan, chhiah chi hrang hrang an tipung leh dawn a. Property tax pawh an tipung ngei dawn a ni, a ti.
Pu Zodintluanga chuan, Aizawl khawpuia hmasawnna ruhrel lian zawng zawng hi Congress kutchhuak vek a ni. Tui hnianghnar taka kan neih theihna tura phase II buaipuitu hi Congress a ni. Ṭhalaite tan infiamna hmunhma chi hrang hrang kan buatsaih a, Aizawl tan leh Mizoram tana Congress hnathawhte hi vawi khata sawisen mai chi a ni lo, a ti bawk.
Pu Zodintluanga chuan, tunah hian MLA pakhat chauh kan neih avangin kum 2028 ah Congress chu an la sorkar zo lovang ti an awm ṭhin. Amaherawh chu, kum 2008-ah khan MLA 32 neiin kan hnathawh ṭhat avangin 2013 ah MLA 34 kan nei. Chuti chung chuan 2018 ah MLA 5 chiah neiin sorkarna ah kan tla chiang hle. Politics ah hian thil thleng thei lo a awm lova, zankhat thil thuah borual a in thlak danglam vek thei. Tunah hian Mizoram tana Party pathumte rorel dan mipuiin an hria. Zoram mipuite hi Congress Party ah an lungleng ṭan mek a ni, a ti bawk.
UD&PA Minister lo ni tawh Pu Zodintluanga chuan, SASCI ah North East State dangte'n Vaibelchhe sing hnih sing thum chuangte an hmuh laiin Mizoram chuan vaibelchhe 100 chiah a hmu. Central sorkar pawhin sum leh paiah a ring zo lova, chuvanga state dang aia pawisa min pe tlem a. AMC ah MNF sorkarna an chelh mek a. An rorel dan kan hria. Mipui tan harsatna tam tak an siam a. Thlan tlin nawn tlak an nilo. Pu Zoramthanga hi term 3 a CM tawh, eirukna kawngah a fihlim lovang tih chu Zoram mipui rin dan a ni. Chutih rualin tuna kan CM ni mek ZPM hotupa chuan in lian tak a sak mek bakah thlam ṭha tak a sa zo leh diam tawh. Kum tam tak CM lo ni tawhte neih ang hi kum 2 chhungin a nei hman vek a ni, a ti bawk.
