AMC Sports Complex, Bawngkawn hnathawh dan khawtlang leh AMC te nen contractor te kovin enho vek kan cho. Lalrinenga Ex-Mayor
AMC Ex-Mayor Lalrinenga Sailo chuan, ZPM party in thu dik lo hmanga AMC an beihna thenkhat chu sawifiah ve a ngaih thu sawiin, AMC Sports Complex, Bawngkawn ami hi Local Council leh NGO te remtihna-a PPP Mode a agreement siam a ni a. AMC in Fund a hmuh ang zela hna hi thawh tur a ni. A hman man atangin AMC in 60% leh Bawngkawn khawtlang in 40% chang tur a inrem a ni a, a enkawlna senso erawh chu AMC tum tur a ni, a ti.
Ex-Mayor chuan, Management Committee hi Bawngkawn Local Council hnuaiah din a ni a, AMC Represent mi 2 an tel ve a. A tira Social Media lam a thlalak an tarlan kha AMC in a lak hma ami a ni a. You -Tuber hire-a Bawngkawn West Local Council hruaituten an rawn tih lan lehah pawh hian DPR leh Detailed Estimate sawi chiang duh lovin, an rinthu nen mipuite rilru hruaikawi tumin an rawn sawi leh ta chiam mai a ni, a ti.
Hna te hi kum tamtak chhungin fund tlachawp awm dan a zira thawh an nih avangin lo lang hlui deuhte awmin, fencing post te leh fencing net te a lo bo nual tawh a. A thar hlima engineer ten an approve ang ni thei tawh lo thil thenkhat a awm a. Hna thawh danah hian eirukna leh dik lo taka thawh a awm lo a ni tih hi finfiah kan ngam a. Sorkar hian chhui chiangin Bawngkawn khawtlang leh AMC te nen contractor te kovin enho vek kan cho a, kan duh bawk a ni Ex-Mayor chuan a ti bawk.
AMC Ex-Mayor chuan, Bawngkawn West Local Council, kum 2025 a din, hruaitu tharte hian an area-a Sports Complex awm hi anmahni bila enkawl an tum vangin hetiang boruak hi an siam ta em ni tih hi zawhna lian tak a ni a. Ruling party in remchang lo la-a campaign auhla bera an hmang zui ta phei hi chu a zahthlak a, tualchhung politics tha lo tak khelhna atana hmang tawh lo turin kan ngen a. Inthlana tlin duh luat avanga thudik tawklo hmanga mipui bum tum hi ching tawhlo se kan duh takzet a ni, a ti bawk.
