Kan Candidte Hmeichhia-te thlavang hauh turin kan inpeih reng. MNF Legal Board.
Vawiin khan MNF Legal Board Treasurer Zothansangi Hmar chuan Aizawl Press Club-ah thuthar lakhawmtute kawmin, “Inthlan apianga hmeichhe candidate-ten mawi lo tak taka social media-a beih an tawk thin hi MNF Legal Board chuan pawi an tih thu a sawi a. Hmeichhiate hmusitnaah an ngaih thu a sawi bawk.
Zothansangi Hmar chuan, Mizoram State Election Commission chuan India Danpui leh Mizoram Municipalities Act, 2007 in mawhphurna a pek angin, April, 21 chu AMC inthlan hun tur atan a puang ta a, Danin a sawi anga hmeichhe seat eng emaw zat bakah general seat thlengin hmeichhe candidate kan nei ta nual mai a. Hei hi Mizo hmeichhiate hmasawnna nasa takah MNF chuan kan ngai a ni, a ti.
A bikin tun hnaiah MNF ten AMC inthlanna lo awm tura Ward- IV-a kan candidate Nl. R. Lalnunthari (Nunui Rualheng) chuan mawi lo tak tak, hmeichhiat mipatna rawngkai leh hmeichhiate zahawmna tibawrhbang thei zawnga beihna a tawk nasa hle tih sawiin, hemi chungchang hi kan ngai thutak hle a. Hetiang hi a thleng leh a nih chuan a tul ang zelin MNF Legal Board chuan hma kan la ang, a ti a. Kan candidte hmeichhiate hi engtiklai pawhin an thlavang hauh turin kan inpeih reng a ni, a ti bawk.
Political Party tin te leh candidate zawng zawng ten an zawm tur Model Code of Conduct 2026 chu State Election Commission Mizoram in an rawn chhawpchhuak a. Tin, hetianga mimal nun phawrh sak zawnga campaign hi Model Code of Conduct 2026 Bung II (c)-na hian a khap tlat a ni. Model Code of Conduct-ah chuan heti hian a inziak: - II (c) Khingpuite leh party hruaitute mi mal nun, mipui rawngbawlna lam nena inkaihhnawih ni si lo, insawi chhiatna.
Hetianga State Election Commission-in inkaihhruaina tha tak a siam chung pawhin mi thenkhatte chuan kan duhthawh luatah tun hnai lawkah social media lamah an khingpuite mimal nun leh an nihna dik lo takin, mipuite rilru hruaikawi tur zawngin, thlalak leh thu post an siam nasa hle a. Hei hi a pawi kan ti takzet a. Kum 2026-ah hetiang thil a la thleng hi a zahthlak kan ti a ni, a ti bawk.
Tin, inthlan a nih avanga candidate hmeichhiate zahawmna leh mawina tibawrhbang zawnga thu leh thlalak thehdarh te hi India ram criminal law hnuaia pawikhawihna a ni a, court thubuai neih theihna leh thiam loh chan phei chuan lung in tan emaw pawisa chawi theihna a ni. Kan ramin changkan lam kan pan mek emaw kan tih laia inthlan apianga a hnufual zawng leh hnungtawlh zawnga kan inbei thin hi chu India rama literacy rate sanna state tih atan hian a mawilo takzet ni mai lovin tih loh tawp tur a ni, a ti.
