Nimin khan kum 2026 atana Hnam Run hawnna prpgramme leh mi thar lawmluhna hun hman a ni a. MNF President Zoramthanga chuan thu sawiin, "Pathianin MNF min hruai dan hi a mak hle a, underground hun aṭanga overground hnuah pawh ral vek theihna aṭangin min chhanchhuak ṭhin. Awihawm lo khawpa makin Pathianin min hruai a, min hruai zel dawn a. Manganna hrang hrang kara kum 64 MNF min hruai tawhtu Pathian hian MNF hi kawng laklawhah min kalsan lovang. Pathian vuan tlat ila, Amah i innghat tlat ang," a ti.
MNF President chuan, "India ram leh Mizoramah pawh Party tam tak an ral tawh laiin MNF chu Mizoramah pawh party ruhrel lian ber kan ni mek a. 'Pathian leh kan ram tan' tia kan din tlatna chu kan felnaah Pathianin a ruat a. In thlaphan dawn apiangin Pathian kan innghahna a ni tih hrereng turin MNF mipuite ka chah duh a ni," a ti a. "Pathian leh kan ram tan, kan tih hi thiltihin a zui tur a ni a. Isua-in vana a lawn dawna a thusawi 'kal ula thilsiam zawng zawng hnenah chanchin ṭha hril rawh u' tih hi MNF-in kan tum ber a ni a. Krista chanchin ṭha hril tura Mizoram mipuite buatsaih hi MNF party innghahna leh thil tum pawimawh ber a ni," a ti bawk.
Hnam Run hawnna inkhawm hi Pu Vanlalzawma, Vice President-in a kaihruai a. Rev Dr Vanlalbela'n hunserh a hmang a. Kumthar atana Pathian hruaina dila ṭawngṭai rualna hun hman niin, Martar-te sunna hun hman a ni bawk a ni.
