Vawiin ni 23.1.2026 Zirtawpni-a MPCC in Congress Bhavan-a Political Session an neih-ah, MPCC Senior Vice President Lalnunmawia Chuaungo chuan thu sawiin, "Tunhnaiah Lengpui Airport hrula ram inlei chungchangah thu a darh a, Mizoram mipui ten kan ngaihven tlang in kan vei tlang a, hetiang thil diklo kan vei hi a lawmawm hle in ka hria. Hetiang thil diklo tak hi kan enliam mai tur a ni lova, hetianga dan bawhchhiatna nasa tak awm hi a ti tute hrem loha an chhuah loh nan mipuiten tan kan lak a ngai a, party ang pawhin kan enliam mai mai tur a ni lo, a ti.
"Lengpui Airport bula ram lei chungchangah hian MNF khan thil tenawm tak tih tumin hma an ni a sawiin, MPCC Senior Vice President chuan sum vaibelchhe tam tak ei tumin thil an kalpui a. Mahse official a an kalpui thui hma in an sorkar kha a tlak tak avangin an tifel hman ta lova. ZPM an lo sorkar a, February ni 21, 2025 khan kan CM Lalduhoma hian compensation tam uchuak tak pek tumna a awm avangin Lengpui Airport bul ram inleina chu an titawp rih a, 'Abeyance' ah an dah tih a sawi anih kha. Mahse Abeyance ah an dah tak tak lo nge ni, Henry-a te an che a, May ni 25, 2025 khan ram inleina tur notification an ti chhuak leh ta si a ni, a ti.
MPCC Senior Vice President chuan, "He ram in leina ah hian Land Aquisition Process mumal taka kalpui a ni lova, mipui a nghawng dan tur, social impact tur pawh zirchian a ni lova, hmanhmawh taka kalpui a ni. July ni 24 ah khan ram inleina an tifel vek hman a, ram lak dan tur kal hmang anga kalpui a ni lova, dan pawh an bawhchhe vek a ni, a ti a. "Hmanni khan Adviser to Chief Minister khan MNF sorkar laia tih fel vek a ni tawh a, DC level ah tih fel a ni a, kan hriatpui lo tia a sawi hi CM leh sorkar hotu lawk te hian an hriatpui a, dawt a ni. Dan bawhchhiatna tam tak a awm a, dan an palzut vek a ni, a ti bawk.
MPCC Sr. Vice President chuan, "AMC inthlan an sawn hla te hi Democracy zah lohna leh ngaih pawimawh lohna a nih thu sawiin, AMC hi mipuiten an aiawh atana an thlan ten ro an relna a ni a, state sorkarin direct-a a enkawl tur a ni lo. AMC inthlannte hi chhan leh vang tha leh mumal tak a awm loh chuan sawt hlat thiang a ni lo. Covid Pandemic vanga inthlan tih tlai erawh kha chu chhan tha tak vang a ni a, mi zawng zawngin an hrethiam a ni, a ti bawk.
