AIF tan Lengpui Airport bul ram lâk avanga Cheng Nuai 11790 insemna awm anga lang hi, Mizoram history a mipui pawisa eirukna lian ber a ni. Dr. Lallianchhunga
Vawiin khan MPCC Spokesperson Dr. Lallianchhunga chuan Aizawl Press Club-ah thuthar lakhawmtute kawmin, Compensation hmanga Indian Air Force (IAF) te tana Lengpui Airport bul ram lâk a nih dan chungchangah dan bawhchhiatna nasa tak a awm avangin, Congress party chuan he thil thleng hi angai thutak hle a ni, a ti.
Dr. Lallianchhunga chuan, Press Conference leh Press Release hmang tein vawi engemaw zât thudik puangzar turin ZPM sorkar a lo ngen tawh thin tih sawiin, mipui pawisa tam tham tak, nuai 11790 chuang insemtu an awm ngei a ni tih hi Mizoram mipui rin dan a nih avangin, Feb 5, 2026 khan CBI Aizawl Unit hnenah pawh hemi chungchang hi chhui ngei turin First Information Report (FIR) kan thehlut tawh bawk a. Heti khawpa kil hrang hrang aṭanga ZPM sorkar kan nawr chung hian, ZPM sorkar hotute zingah a hlawkna têl vetu an awm nge, ZPM sorkar chu insawifihlim tumin ṭan ala khawh char char a ni, a ti bawk.
Dan bawhchhe chunga Lengpui Airport bul ram IAF te tana an lak theihna tura remtihna petute chu Chief Minister Lalduhoma leh Revenue Minister B. Lalchhanzova te an nih thu sawiin Dr. Lallianchhunga chuan, Feb 21, 2025 khan Chief Minister chuan IAF in Lengpui Airport bul ram lei an tum chungchang hi ‘tihtawp lailawk’ (kept in abeyance), a nih thu Assembly Budget Session ah a sawi a. Amaherawh chu, hemi hnu lawk hian chak takin file an kal tir a. May 15, 2025-ah Preliminary Notification an chhuah chûk chûk a, hemi ni vek hian Social Impact Assessment (SIA) neih ngai lo (exempt) turin Revenue Minister B.Lalchhanzoa’n phalna a pe nghal bawk a. Secretary, LR & S in fimkhur taka Notesheet a a ziah chu chungtlâk (Override) turin Revenue Minister in July 18, 2025-ah leh Chief Minister in July 21, 2025-ah te khauh (Strong) takin an ziah hnan a. July 24, 2025 ah Compensation Award an tifel a, a tuk lawk July 25-ah ram leina man chu Rohmingliana kutah Rs. 32,41,94,731 leh Henry Lalremsanga Hlawnmual kutah Rs.117,90,26,341 pek nghal a ni ta a. August 26-ah Rohmingliana hnenah Rs. 37,58,05,269 pek leh a ni. Hetiang khawpa chaka thil kalpui a nih avang hian Chief Minister leh Revenue Minister te hi mantang insemnaah an tel ve ngei ang tih a ti rinhlelhawm zual hle a ni, a ti bawk.
Revenue Minister B.Lalchhanzoa’n Assembly a ziaka chhan chi zawhna (Unstarred Question) a chhanna aṭangin IAF te tana Lengpui Airport bul ram lak a nih danah te dan bawhchhiatna a awm tih a lang niin Dr. Lallianchhunga chuan a sawi bawk.
