Nimin MPCC President Lal Thanzara chuan Dampa bial bye election lo awm tur atan, West Phaileng-ah Congress worker ten infuihtharna hun an buatsaih a hmanpui.
Lal Thanzara chuan thu sawi in, kan Sport Minister in hman ni khan 'pulpita dinpui ngam politic kan khel tur a ni' a ti a, thu tha tak a ni. A awmna party leh Chief Minister te awmdan hi a ngaihtuah lo em ni tih ka ngaihtuah a. Pulpita dinpui tlak politic kan khel dawn anih chuan inthlan hmaa BJP sum an hman te kha an inchhir thu sawi se ka ti hle mai, a ti.
Lal Thanzara chuan, Mizoram hian Chief Minister tha tak tak Pu Ch. Chhunga, Pu Thena te, Pu Lal Thanhawla te, Pu Laldenga, Pu Zoramthanga te kan nei tawh a. An ni khan thu dik lo an sawi an sawi kan hre lo. Tuna kan Chief Minister hi Kohhran upa a ni a, thubelhchian dawllo a sawi fo mai hi a tha lo a, kohhran hotute pawhin sawipui ngam se a tha in ka ring, a ti a. Kan Chief Minister hian hman ni lawk khan Silisuri khuaah Mizoram a sorkarna lo chelh tawh, kan hotu hmasa ten Chakma huat mipui an zirtir ang khan a sawi a. Chakma vote a duhna lamah khatianga a sawi kha a tihtur a ni lova, Chief Minister sawi awm pawh a ni lo. Chief Minister chu Mizo mipuite tan pa nih tling a ni tur a ni a, khatianga Chakma te fuihpawrh zawnga thu a sawi kha thil pawi tak a ni. Khatiang khan tunhma a Chief Minster ten an sawi ngai lo, a ti bawk.
MPCC President chuan, Phuldungseiah kan thlen in nu chuan Dr. Thangtea kan ina a rawn len in a haw turin min rawn bekbawr a, kan hotupa hi kan duh tawh lova, kei hi a lehpeka Chief Minister tur ka ni a ti, tiin a sawi a. Hei hian an party hi an buai hle tih a lantir in ka hria. Tunah hian an President ber pawh helamah rawn kal lovin Lunglei lamah a kal daih a ni. A ni hi tling se MNF hi an buai phah hle in ka ring, a ti a. MNF hi kan hriat angin India hmarchhak a BJP thawhpui tu pawl NDA ah an tel a, ZPM hi an tel em ka hre lo, mahse Central lamah chuan BJP sorkar an thlawp tih kan hre vek a ni. Sunday School kal thin, Mizo Kristian ni si chanchintha puan dodaltu BJP an thawhpuia an support duh hi thil mak tak a ni. Rahul Gandhi pawhin MNF sorkar lai khan a rawn kal tumin Kristianna India ram atanga nuaibo duhtu BJP te MNF in an zawm kha mak a tih thu a sawi hial a ni.
MPCC President chuan, Mizoramah hian Congress kan sorkar loh chuan mipui te tawrhna a thleng thin. Tunah pawh sum a vang em em a, Aizawl-ah phei chuan mi tamtak chu ZPM an vote vangin an inchhir mek a ni. Congress sorkar ah kha chuan NLUP vang khan chhungkaw tam takin eizawnna bul an tan a, tam takin an dinchhuahpui bawk. Tuna Mizoram mamawh ber chu Congress sorkar tir leh a ni. a ti bawk.
