Mizoram-ah political party 40 chuang a lo ding tawh a, tualto party phei chu an ral vek tawh. MNF President
Inrinni khan MNYF Headquarters leh MNYF Dampa East Block huaihawtin Reiek Community Hall-ah MNYF Dampa East Block Meet neih a ni a. MNF President Zoramthanga'n a hmanpui.
MNF President chuan thu sawiin, Pathianin kan opponent-te hi lalna a pe thin a, an lalna atangin an tla a, an ral thin. Mizo Union te, PC te an lal a, an tla a, an ral vek mai a. Congress an lal a, an han tla chu, MLA ngah êm êm thin khan tunah phei chuan 1 chauh an nei tawh. Party tih tlak awmchhun ZPM-a an hotupa Pu Duhoma lah opposition thang, party tereuh te te dina, chuta dictatorial power-a hrut thang a ni a. Midang thusawi a ngaichang ngai lo a, a mamawh hek lo a. Sawrkarna an chelh hnuah pawh cabinet rawn ngai ti lova, mahni thu thua ti mai thin a ni a. ZPM hi a lehpekah chuan mipuiin an tlin an ring tawh lo a. Kum 5 en chhin duhtute pawh term chanve hmain an inchhir tawh a. Pathianin a tih tlawm duhteho chu lalthutthlengah a hlangkai fo thin a. An lal a, an tla a, an ral mai thin a. MNF te hian political party-a kan opponent te hi chak takin kan su chhia-in kan su tlawm thin a ni ngai lo a. Ngawi rengin kan thlir a, an tla a, an liam mai thin a, a ti.
Pu Zoramthanga chuan, Mizoramah hian political party 40 chuang a lo ding tawh a, tualto party phei chu an ral vek tawh a. MNF erawh kum 64 ni tawhin tun thlengin a la ding a. Engatinge kan tih chuan kan hruaitute leh thawktute that vang leh fel bik vang a ni lo a. Kan thuthlungpui "Pathian leh kan ram tan" tia Lalpa Chanchin Tha hril tur, he thuthlung meichher vuan tlattu kan nih vang a ni, a ti a. Inthlan leha MNF-in sawrkarna a chan leh ngei dawn avangin chumi lo thlir lawka, Dr. R Lalthangliana lo vote tlin chu Dampa bial mipuite tan a tihfuhthlâk ang, a ti a. Article 371(G) leh FCAA chungchang sawi bawkin MNF President chuan, hnam mualpho zawng leh hnam thuthlung sawinghinga kal ngat ngatte hi thangtharte'n an huat a tul a. Thangtharte'n hmabak an neih chhan hi kan Hnam Thuthlung rah a ni a. Kan hnam inhumhimna dan mausam zawnga vaiho hnena hralha, an duh duha an lo luhna kawng hawntu ZPM hi paihthlak a ngai a. Dampa bial mipuite hi a paih hmasa bertu lo ni rawh u, tiin kalkhawmte a chah bawk a ni.
